Buzhala: Rama po e favorizon Vuçiqin (Video)

Kryeministri i Shqipërisë, Edi Rama, po bën gabim që po i jep protagonizëm homologut të tij serb, Aleksandar Vuçiq, vlerëson drejtori i Gazetës Express, Berat Buzhala.

Në një paraqitje televizive në emisionin “Opinion” në TV Klan, Buzhala ka hedhur dyshime nëse kjo gjë nga Rama po bëhet nga naiviteti i tij.

“Rama po favorizon Vuçiqin. Fuqimisht”, ka thënë Buzhala.

“Ramës nuk i duhet Vuçiqi. Vuçiqit i duhet Rama”, është shprehur drejtori i Gazetës Express.

Sipas Buzhalës, kryeministrit serb i duhet kryeministri shqiptar për të thënë para botës se me shqiptarët i ka raportet e mira.

Buzhala ka kujtuar se Vuçiq ka realizuar gjenocid ndaj shqiptarëve, sa ishte pjesë e regjimit të Sllobodan Millosheviqit.

Buzhala ka hedhur poshtë pretendimet e Ramës dhe Vuçiqit për t’u shfaqur si liderë të Ballkanit.

“Çfarë liderë jeni? Më liderë se Greqia, Bullgaria, Kroacia?”, ka pyetur Buzhala.

“Kroacia nuk ia dha këtë mundësi a Vuçiqit, as (Tomisllav) Nikolliqit. Nuk ia dha as Greqia, e as Bullgaria”, ka kujtuar Buzhala.

Drejtori i Gazetës Express ka vënë në pikëpyetje nevojën e Ramës që të zhvillonte takimet e shumta me Vuçiqin, në Tiranë e në Beograd. /Express/