Çifti shqiptar kapet me mbi 3 mijë tableta barnash kontrabandë në Durrës (VIDEO)

Policia e Durrësit ka ndaluar një çift shqiptarësh me banim në Norvegji pasi u kapen me ilaçe kontrabandë.

Efektivat e Drejtorisë Rajonale për Kufirin dhe Migracionin Durrës, mbrëmjen e datës 08.10.2016, kanë goditur një rast kontrabande me mallra të liçensuara.

U arrestua Arsim Gashi 43 vjeç, banues në Norvegji, me shtetësi Norvegjeze dhe kombësi Shqiptare.

Gjithashtu filloi procedimi penal në gjendje të lirë në ngarkim të bashkëshortes së tij, shtetases: F.G. 38 vjeçe, banuese në Norvegji, me shtetësi Norvegjeze dhe kombësi Shqiptare.

Shtetasit e mësipërm bashkëshortë me njëri -tjetrin, më datë 08.10.2016, rreth orës 21: 00 janë paraqitur pranë kabinave te kontrollit të Policisë Kufitare PKK Port Durrës për t’u imbarkuar në tragetin e linjës Durrës- Bari, me mjetin tip Ford me targa LS75558 me destinacion përfundimtar Norvegjinë.

Efektivat e Policisë, bazuar në disa dyshime e kanë kaluar mjetin për kontroll më të hollësishëm në Vijën e Dytë dhe pranë Skanerit S2 Albania.

Pas ekzaminimit u konstatuan disa pjesë të dyshimta në makinë tek pjesa e parakolpit dhe mbrapakolpit te saj.

Pas kontrollit të kryer u vu re se në këto pjesë gjendeshin 3 komardare gome të izoluara me tel, brenda të cilave u gjetën dhe u sekuestruan në cilësinë e provave materiale:

një sasi e konsiderueshme ilaçesh të llojit Apaurin Diazepam në total 3 030 tableta, 45.450 kokrra.
Materialet i kaluan Prokurorisë së Rrethit Gjyqësor Durrës për veprime të mëtejshme për veprën penale “Kontrabanda me mallra te licencuara” parashikuar në nenin 173 të Kodit Penal.