Çudira shqiptare/ Në Shqipëri, futboll më i fortë se në Gjermani

Mesfushori i Laçit, Faton Toski, ka qenë ndër emrat më të spikatur të kurbinasve në këtë fillim sezoni ndërsa sot ka shënuar një gol të rrallë në ndeshjen me Vllazninë duke ndihmuar ekipin e tij të merrte tri pikë në një transfertë të vështirë. Por mesfushori i cili në të kaluarën ka luajtur edhe në Bundesligë, ka çuditur duke deklaruar për “SuperSport” se në vendin tonë luhet një futboll më i fortë se në Gjermani.

Për golin nga distanca

“Nuk ishte hera e parë që shënoj ashtu. Mendimi i parë është që dikush nga lojtarët në zonë ta godasë topin, por nëse nuk e arrijnë, sfera përfundon gjithsesi në rrjetë. Si përfundoi në rrjetë, ka edhe pak fat. Në javët e kaluara nuk kishim fat ndaj mirë është edhe kështu”.

Për kalimin nga Bundesliga te Laçi

“Isha një vit pa skuadër, kisha disa probleme dhe në fund erdhi kërkesa nga Laçi. I thashë vetes pse jo, të kthehesh në vendin tënd të luash me shqiptarë. Deri tani jam i kënaqur”.

Për kampionatin shqiptar

“Deri sa erdha këtu nuk e kisha ndjekur kampionatin. Por tani e shoh që është një futboll shumë i fortë, më i fortë se në Gjermani. Futbollistët janë të mirë, por ritmi i lojës është më i ulët. Siç e thashë, është futboll shumë i fortë”.