Dajë e mbesë kapen me drogë në makinë, sekuestrohen 73 kg

Antidroga në Kukës zbulon ngarkesën me lëndë narkotike në një makinë në të cilën udhëtonin dy persona.

Gjatë mbrëmjes së djeshme u vunë në pranga Shaqir Duraku, 39 vjeç, banues në fshatin Morinë, Kukës dhe Albulena Berisha, 22 vjeçe, banuese në Prizren, Kosovë.

Arrestimi i tyre u bë pasi gjatë kontrollit të ushtruar në automjetin tip “Benz”, me targa AA 448 OZ, i drejtuar nga Duraku dhe pasagjere Albulena Berishën, në pjesën e bagazhit, u gjetën dhe u sekuestruan 73 kg lëndë narkotike kanabis sativa.

Në cilësinë e provës materiale u sekuestruan 73 kg lëndë narkotike dhe automjeti tip “Benz”.

Noa.al mëson se dy të ndaluarit janë dajë e mbesë, pasi Duraku e ka 22- vjeçaren vajzën e kushërirës së parë dhe mendohet se prania e saj në mjet do bënte që të kalonte pa ngjallur dyshime te policia.

Arrestimi i tyre u bë në afërsi të tunelit Kukës- Morinë, ku nga kontrolli në mjet u zbulua ngarkesa e lëndës narkotike.

Duraku dhe Berisha akuzohen për veprën penale “Prodhim dhe shitja e narkotikëve, kryer në bashkëpunim”, ndërsa në ngarkim të tyre materialet, i kaluan Prokurorisë së Kukësit për ndjekje të mëtejshme.