De Biazi bën pesë ndryshime për sfidën ndaj Spanjës (FORMACIONI)

Spanja nuk është Lihtenshtejni dhe Xhani De Biazi s’mund të dalë nga roli. Shqipëria do të rikthehet ajo e zakonshmja nesër në “Loro Boriçi”, me skemën e preferuar të trajnerit italian, 4-5-1. Një tjetër strategji do të ndiqet ndaj iberikëve, nisur edhe nga cilësia e madhe që ka kundërshtari, i cili vjen në Shkodër me synimin e vetëm për të marrë tri pikë.

Kuqezinjtë janë stërvitur në fushën sportive “Reshit Rusi” mëngjesin e së shtunës dhe ajo është tentuar të realizohet me dyer të mbyllura dhe larg vëmendjes së të gjithëve. Në stërvitjen e paradites, trajneri De Biazi është ndalur te disa veprime kryesisht në anën taktike të ekipit. Italiani ka preferuar që të kurojë më shumë fazën mbrojtëse.

Mbrojtja do të ketë vetëm një lëvizje, teksa vendin e Alijit do ta marrë kapiteni Agolli. Hysaj nga e djathta dhe Gjimshiti e Mavraj në qendër janë të padiskutueshëm. Në mesfushë rikthehet titullar Memushaj, ndërsa pjesa tjetër do të plotësohet nga Xhaka dhe Lila, si dhe Roshi dhe Lenjani (ul në stol Hykën), që do të luajnë nga krahët. Në stol do të ulet edhe Azdren Llullaku, që debutoi si titullar ndaj Lihtenshtejnit. /Panorama/

forma