De Biazi e pranon: Firmos për 0-1, ta zgjidhim me zgjuarsi

Trajneri i përfaqësueses shqiptare, Xhani De Biazi, ka pranuar se është gati të firmosë për një fitore minimale në Lihtenshtejn, pasi për të është më e rëndësishme sigurimi i tri pikëve, sesa rezultati me të cilin arrihet fitorja.

Në konferencën e fundit për shtyp, tekniku pranoi se po mendonte që tani për Spanjën, duke racionalizuar forcat për të dy ndeshjet. Ai ka folur për mungesat në këtë grumbullim, si dhe për ndryshimet në formacion, për mënyrën si duhet zgjidhur ky takim dhe për cilësitë që ka kundërshtari.

PËR SADIKUN

“Sadiku është një nga lojtarët më të mirë që kemi. Ka shënuar në ndeshjen e fundit në Ligën e Europës me ekipin e tij, si dhe në atë të fundit me ne kundër Maqedonisë. Kam biseduar sot (dje) pas ndërhyrjes që ka kryer dhe uroj që të rikthehet sa më shpejt. Skuadra do të bëjë maksimumin që të mos ndihet mungesa e tij”.

STATUSI I FAVORITIT

“Jemi të përqendruar të bëjmë maksimumin, të bëjmë gjithçka për të fituar. Kjo ndeshje përgatitet në kokën e lojtarëve dhe në fushë. Nëse i bëjmë gjërat siç duhet, mund të fitojmë. Çdo ndeshje është e vështirë. Asnjë ndeshje nuk fitohet përpara se të luhet dhe kjo është e tillë ku na duhet të sillemi me shumë inteligjencë. I dimë cilësitë e tyre dhe duhet të bëjmë më të mirën që të mund t’i vëmë ne në vështirësi, e jo ata të na vënë neve. Si me një ‘peshore farmacie’ duhet të racionojmë energjitë dhe të dimë të vrapojmë atëherë kur duhet”.

PËR NDRYSHIMET E SHUMTA

“Po i numëroja dhe nuk më dalin shumë. Ndonjë është i detyrueshëm, si në rastin e Sadikut. Të tjerët janë dy, besoj, në krahasim me të zakonshmit. Ndonjë ndryshim do të bëhet sepse dikush nuk ka kondicionin e duhur për të luajtur dy ndeshje. Duhet të mendojmë se, nga e nesërmja deri të dielën, do të luajmë dy sfida të rëndësishme. E gjitha që kemi bërë në stërvitje dhe që kemi ideuar për këtë 90- minutësh, është e kalibruar për t’u munduar të shpërndajmë forcat se ne kemi nevojë për cilësi, ritëm e ta bëjmë gjithçka mirë”.

PËR RRESHTIMIN

“Nuk e di të them se cili formacion zbret në fushë, pasi kemi provuar situata dhe zgjidhje të ndryshme. Do të mundohemi të zgjedhim një rreshtim sa më të ndryshëm nga i zakonshmi, për ta vënë në vështirësi kundërshtarin. E di që nuk do të jetë ndeshje e lehtë, por duhet të mundohemi të bëjmë lojë me inteligjencë dhe përqendrim. Duhet të bëjmë ndeshjen për të vënë në vështirësi kundërshtarin, nëpërmjet goditjeve standarde, apo lojës përpara”.

PËR ITALI-SPANJË

“Ajo është mendimi i fundit i imi, më e rëndësishme për ne është çfarë ndodh këtu. Të përqendrohemi tek ajo që bëjmë ne, ecuria varet nga ne, jo çfarë bëjnë skuadrat e tjera. Ajo që ndodh në Itali, varet nga shumë gjëra. Shpresojmë që Spanja të lodhet, të bëjë një udhëtim të keq, pasi sa më të lodhur të vijnë, aq më mirë për ne”.

PËR NJË FITORE 1-0

“Do të firmosja që tani për të”.