Debat i ashpër në parlament për maturantët/Rama-Topallit: Shko luaj melodramë, PD ta mori Luli

Kryeministri Edi Rama dhe deputetja e PD, Jozefina Topalli, kanë debatuar me njeri -tjetrin në Kuvend sot për nisjen e vitit të ri universitar  pas një pritjeje të gjatë nga maturanët dhe mospërfundimit ende të procesit të regjistrimit. Debati ka kulmuar deri atje sa Rama e ka krahasuar fjalën e mbajtur nga Topalli, me interpretimin e një aktoreje që kërkon të konkurojë Tinka Kurtin!   

Ai ka hedhur poshtë, akuzat e ngritura nga demokrati Luçiano Boçi, për padrejtësinë që iu bë maturantëve duke i privuar nga e drejta e zgjedhjes së degës së dëshiruar dhe ka ironizuar deputeten Jozefina Topalli.

Topalli ka replikuar me Ramën, duke i kujtuar se ankthi disajavor me të cilin i mbajti maturanët, kishte një synim: Që ata të regjistroheshin në universitet private. Po ashtu, Topalli e ka akuzuar për gjuhën vulgare dhe banale me të cilën i drejtohet Kuvendit, duke mos e menduar se është Kryeministri i një vendi: “Të thuash që je çmendur, që e konsideron këtë popull dele…- tha deputetja. – Por në në Milano, Romë, Vjenë, universitetet ka një muaj që janë hapur, kurse këtu sot është dita e parë dhe nuk janë regjistruar ende, sepse pasi i mbajte në ankth me muaj, tani janë turrur në universitetet private që të shërbejnë ty si zvarranik.”

Rama u ngrit sërish në foltore dhe reagoi me ashpërsi ndaj Topallit: “Të gjithë ata që ju besuan ju – sepse ju besuan në fillim ngaqë përputhët brezin tuaj me nevojën e njerëzve të dëshpëruar –  tani, sa më shumë janë regjistruar dhe po regjistrohen çdo ditë, e kuptojnë më qartë se ju nuk duheni dëgjuar.”  Dhe ai ka vazhduar duke ngulur këmbë se fjalët “kazan” dhe përshesh” nuk mundet t’i zëvendësojë me fjalën “antipastë”.

DEBATET RAMA – TOPALLI ME POSHTE:

RAMA: Këta ia dalin të mbajnë mend sadopak nga zhurma e këtij kazani të madh sot se çfarë thoshte parafolësi vetëm disa javë më parë kur në thoshim pikërisht këtë: Mos  i karikoni në mënyrë krejt artificiale maturantët, mos nxisni ankthe të panevojshme tek prindërit, sepse ata që pas raundit të parë menduan se erdhi fundi i botës, duhej ta dinin se nuk bëhet fjalë që të mbeteshin jashtë universiteteve.

Kuotat e vëna në dispozicion nga universitetet publike do të jenë deri në fund në dispozicion dhe do të plotësohen.

Ajo që po ndodh dhe ka ndodhur është pikërisht kjo –  se po lajmëroj Jozefinën që doli këtu me një fotografi duke qarë, se ajo vajza e ka fituar shkollën – se ata që rreshtohen në çdo listë për të filluar jetën universitare, rreshtohen sipas meritës së tyre: Nga më i miri, një pas një.

Dakord, ka një shtyrje disaditore për një arsye shumë të thjeshtë objektive dhe ndoshta kjo vitin e ardhshëm do të kompensohet sepse këtë vit u la shumë kohë për ankimimet, meqë ishte testi i parë. Numri i ankimimeve ishte shumë i ulët në raport me zhurmën e madhe të “kazanit”, por përgjigja ishte automatike se ka funksionuar!

Do të vërtetohet edhe diçka tjetër me mbarimin e regjistrimit, që do të bjerë poshtë: Ata që nuk do të kenë plotësuar kuotat, siç iu bien juve të gjithë hardhitë me rrush gënjeshtrash që mbillni këtu, do t’i plotësojnë dhe do të dalë se universitetet shtetërore do t’i plotësojnë dhe privatët, jo.

Kjo nuk është ajo që bëtë ju: Që regjistronit në shkollë 70 vetë dhe në janar rezultonin 150!

Ndërkohë që filozofia jonë është krejt tjetër, sistemi ynë i regjistrimit në universitet nuk kalon nga “kioska e dajës” dhe diplomat nuk janë “qoftë ke daja” dhe “daja” tani është tek SHQUP-i.

Të gjithë ata që ju besuan ju – ju besuan juve në fillim – sepse përputhët brezin tuaj me nevojën e njerëzve të dëshpëruara dhe sa më shumë njerëz të dëshpëruar, aq më mirë për ju – dhe sot sa më shumë janë regjistruar dhe po regjistrohen çdo ditë, e kuptojnë më qartë se ju nuk duheni dëgjuar.

TOPALLI:  “Nëse Kryeministri ka ndonjë meritë në këtë parlament, ai ka meritën për ta vulgarizuar, banalizuar, për të tërhequr vëmendjen. Mendoni nëse keni dëgjuar në parlamentet e vendeve të tjera që të kenë të tillë vulgaritet, të tillë banalitet. Jo vetëm për vulgaritetin tënd, por për banalizim, në drejtësi, në politikën e jashtme, në sadizëm…

Ti fole për arsimin dhe përsëri gënjeve. Fole si ministri yt që thoshte se 95% e kanabisit është zhdukur në këtë vend. Të thuash që je çmendur, që e konsideron këtë popull dele, por nëse në Milano, Rome, Vjenë, universitetet kanë një muaj që janë hapur, këtu sot është dita e parë dhe nuk janë regjistruar ende, pasi i mbajte në ankth me muaj, tani janë turrur në universitetet private që të shërbejnë ty si zvarranik.”

RAMA:  “Jozefinë! The ç’nuk the, por nuk kuptova çfarë por jam i sigurtë që ti e di me siguri se ç’deshe me thënë. Unë fola për atë fakt, kur ti dole këtu herën e kaluar me atë fotografi dhe konkurove Tinka Kurtin, se në PD nuk ke më kë konkurron, se e ka marrë Luli. Me sa kuptoj, ti me Tinkën je rrotë më rrotë.

(E ndërpresin nga salla, Rama ia kthen një deputeti të PD: Në emër të Tinkës do të replikosh ti!)

Jozefinë, po gënjen! Po abuzon me një njeri, fotografinë e të cilës e nxore këtu dhe po gënjen. Unë çfarë thashë këtu?! Unë isha 100% dakord me Luçianon. Isha 100% dakord. Luçiano çdo javë ka fjalimin e vet për arsimin dhe sipas javës thotë që duhet të thotë. Sot tha “ja punët e mira”, ekzaktësisht atë që kemi thënë ne që javën e parë: Mos dëgjoni Jozefinën, mos dëgjoni Luçianon, se edhe pas raundit të dytë do të ketë një vijë të kuqe që do të ulet, do të plotësohet. A e thamë këtë?! Tani vjen e thua shih sa kuota të tjera kemi!

Të kam thënë dhe herë tjetër. Ti je nga figurë e paktë këtu që ke autoritet global dhe flet në mënyrë globale: Roma, Viena, Milano… Herën tjetër e kishe me Pekinin dhe dakord, bën një politikë globale se je kryetarja e vetme e parlamentit në Europë që ke bërë më shumë fluturime globale. Me tërë ato milje që ke bërë, ti do të fitosh me siguri udhëtime falas për tërë jetën!

Kur fillonte fakulteti në Shkodrën “tande”?! Merr në telefon Saliun dhe thuaji se shkollat fillonin më 1 nëntor dhe regjistrimet vazhdonin deri më 1 janar! Nisnin me 40 studentë dhe përfundonin me 140!

Unë nuk di të ketë ndonjë kolege tjetër si jotja që t’i ketë thënë kostumit, “zhele”!

Unë përmenda këtu dy fjalë, “kazan” dhe “përshesh”!

Ku janë këto fjalë këtu që të dëmtojnë timpanin e veshit tand?!

Nëse ju hani përshesh dhe doni që t’u quhet antipastë, por ta fusni fjalën përshesh tek fjalët që ju shqetësojnë, kjo më duket e padrejtë! Po ju shtohen ata që duan të hanë nga përsheshi juaj. Ku është problemi këtu?!