Demollari: Lihtenshtejni si mur, duhet lojë nga krahët

Sulejman Demollari ka një kujtim të hidhur nga skuadrat e ashtuquajtura të vogla. Më 17 prill të vitit 2002, Shqipëria e drejtuar nga ish-lojtari legjendar, humbte 2-0 në Andorrë. Ishte një ndeshje që i shkaktoi Demollarit largimin nga stoli, por megjithatë për trajnerin mbetet thjesht një miqësore.

“Nëse flasim për ndeshjen që unë kam drejtuar Kombëtaren, ju kujtoj se Andorra ka qenë thjesht një miqësore. Të tilla ndeshje janë stërvitore, për të parë gjendjen e skuadrës dhe kontrolluar ndonjë lojtar. Sa i përket rezultatit, atëherë ka qenë më shumë një aksident.

Kanë ndodhur shumë herë që të ketë rezultate të çmendura, ku ekipet e vogla kanë fituar. Megjithatë, jo për justifikim, por për mendimin tim, nuk është barometër një humbje në miqësore”, ka thënë dje Demollari për “Panorama Sport”.

Ish-trajneri i Shqipërisë flet edhe për takimin e sotëm të Kombëtares. Sipas tij, kuqezinjtë duhet të luajnë nga krahët, pasi është e vetmja mënyrë që të fitojnë ndaj një skuadre, e cila do të mbrohet me shumë forca. “Këto ekipe si Lihtenshtejni, që në letër janë inferiore, gjithmonë mendojnë të luajnë me sa më shumë forca në prapavijë për të mos pësuar.

Kuptohet që për cilëndo skuadër, jo vetëm Shqipërinë, është shumë e vështirë të shënosh ndaj ekipeve që mbrohen me shumë lojtarë. Kjo bëhet shumë e lehtë kur këtyre skuadrave u shënon në minutat e para. Çdo ndeshje ka vështirësitë e veta, edhe pse përballë mund të kesh një ekip modest dhe pa përvojë.

Nëse Kombëtarja bën lojën që jemi mësuar ta shohim, unë them që do t’ia dalim pa pasur vështirësi në Lihtenshtejn”, është shprehur zv.trajneri aktual i Kombëtares U- 19.

Në fund, ai jep edhe “recetën” se si mund t’ia dalin kuqezinjtë. “Përveçse kundërshtari do të jetë i kujdesshëm në mbrojtje, unë mendoj se do të tentoj që përmes kundërsulmeve të na rrezikojnë, duke shfrytëzuar ndonjë rast përpara portës.

Në të tilla kushte, kur ke përballë një ekip që vetëm mendon të mbrohet, Shqipëria duhet të fokusohet te loja nga krahët dhe të shfrytëzoj krosimet në zonë. Vetëm kështu mund t’ia dalim, duke qenë seriozë”, theksoi Demollari, i cili e ka drejtuar Shqipërinë nga 01.09.2001 deri më 17.04.2002.