Detaje të reja për plagosjen me armë zjarri në Tufinë, dyshime se 21-vjeçari fsheh të vërtetën

TIRANE- Një i ri përfundoi në spital mbrëmjen e djeshme, i plagosur me armë zjarri në këmbë dhe në krah. Ngjarja ka ndodhur në Tufinë, në rrethana ende të paqarta. Policia e mbërritur në vendngjarje ka transportuar në Qendrën Spitalore Universitare 21-­vjeçarin Dritan Xh, të plagosur me armë zjarri.

Pasi ka marrë ndihmën e nevojshme mjekësore, i riu është marrë në pyetje nga policia, ku ka thënë se sapo ka dalë nga banesa është qëlluar me armë. Ai ka thënë para uniformave blu se, nuk e ka parë se kush e ka qëlluar, ndërsa mohon të ketë konflikte me ndonjë person.

Por burime nga policia për “BalkanWeb”, sqarojnë se pas këqyrjes së vendit të ngjarjes dhe pas veprimeve procedurale, policia ka gjetur afër vendit ku u gjet 21-vjeçari, edhe një motor me shenja plumbi. Motori dyshohet se është përdorur nga njeriu.

Ndërsa gjatë kontrollit në banesën e 21-vjeccarit, policia sekuestroi një pushkë 10-she dhe një automatik me 3 krehër.

Në këto kushte është arrestuar për armëmbajtje i ati i djalit, si dhe janë referuar në Prokurori materialet për moskallëzim krimi për 21-vjeçarin Dritan Xh.

Policia dyshon se 21-vjeçari i njeh autoret, dhe po fsheh të vërtetën.

(el.sp/BalkanWeb)