DETAJET/ Italianët erdhën për trafik droge në Dhërmi, prishën gomonen kur u rrethuan

Një gomone me dy shtetas italianë në bord është kapur mbrëmjen e djeshme në Dhërmi të Vlorës.

Lajmin e kanë konfirmuar për “Panorama” burimet zyrtare të policisë të cilat thanë se gomonia u sekuestrua gjatë natës nga Guardia Delta Force dhe Policia Kufitare.

Paraprakisht dyshohet se gomonia kishte ardhur në Shqipëri për të marrë drogë dhe më pas për ta transportuar atë në Itali.

“Panorama” ka mësuar edhe emrat e dy italianëve të ndaluar. Ata janë Gianfranco Majorano 50 vjec dhe Massimiliano Chimienti nga Brindesi.

Në deklarimin e tyre përpara efektivëve, italianët kanë thënë se gomonia kishte pësuar defekt dhe se kishin ardhur për të kaluar në Greqi.

Mjeti lundrues është me dy motorë të fuqishëm. Megjithatë policia tha se nga kontrolli i gomones, rezulton se në të nuk kishte lëndë narkotike.

DETAJET

‘Panorama” ka mësuar më shumë detaje në lidhje me gomonen e kapur një ditë më parë në Dhërmi. Burimet thanë se informacioni ka mbërritur fillimisht në policinë kufitare dhe më pas është ngritur një shërbim sekret në det nga drejtues të policisë kufitare të qarkut Vlorë të cilët kanë qenë në krye të aksionit.

Ndërkohë mjeti sapo u afrua në breg është bllokuar nga një mjet kufitar në afërsi të Dhërmiut. Në këtë moment është kërkuar bashkëpunim me Delta Forcën, Policinë e Rendit dhe Gurdia di Finanza për krehjen e zonës.

Aksioni ka vijuar gjatë gjithë natës deri në orën 5 të mëngjesit. Mësohet se nga toka nuk është gjetur asnjë lëndë narkotike dhe po vijon edhe sot ekspertiza pasi drejtuesit e mjetit rezultojnë me precedentë penalë në Itali. Burimet theksojnë se dyshimet janë për një trafik të mundshëm që mund të kryhej në drejtim të Italisë.

Nga ekspertiza paraprake në gomone punonjesit e policise kufitare kane verifikuar se dy pilotet kanë shkaktuar defekt vetë në motor me qëllim shmangien e gjurmëve.

DEKLARATA E POLICISE:

Policia Kufitare e Vlorës në bashkëpunim me Policinë Vendore Vlorë, Repartin Delta dhe Guardia di Finanza, në kuadër të planit të masave për të parandaluar dhe goditur trafikun e lëndëve narkotike nëpërmjet kontrollit ujor dhe tokësor, kanë bërë të mundur konstatimin e një mjeti lundrues rreth orës 22:02 dhe bllokimin e tij në Gjirin e Gjipeut, rreth 0,5 milje larg bregut, të llojit “Gomone” me një motor mërkuri 250 hp, 8 m e gjatë dhe 2 m e gjërë.

Në bordin e këtij mjeti lundrues ndodheshin dy shtetas italianë:
– G.M., 49 vjeç, banues në Brindisi.
– M.Ch., 40 vjeç, banues në Brindisi.

Gjatë kontrollit të ushtruar në këtë mjet lundrues nuk është konstatuar asnjë send apo material i kundraligjshëm.

Dy shtetasit italianë janë persona me precedent kriminal në drejtim të trafikimit të lëndëve narkotike në shtetin Italian pasi gjatë hetimeve të kryera nga Policia e Vlorë, ka rezultuar se këta shtetas janë pajisur me Vendim të Gjykatës Italiane për të mos dalë nga shteti i tyre.

G.M. dhe M.Ch. janë shoqëruar pranë Drejtorisë Vendore të Policisë Vlorë dhe më pas janë marrë nga Policia Kufitare me qëllim kryerjen e veprimeve për tu proceduar për veprën penale “Kalimi i paligjshëm i kufijve”.

Policia vijon hetimet për të zbardhur shkaqet e hyrjes së këtij mjeti lundrues në ujërat territoriale të vendit tonë.