Disa fakte: Pse po çmendet bota pas MIG-ëve të Shqipërisë? (Foto)

Zor të shohësh një fluks të tillë interesi në mediat e huaja për një çështje që lidhet më Shqipërinë.

Bëhet fjalë për një tender të Ministrisë së Mbrojtjes për të shitur disa prej avionëve luftarakë të Shqipërisë, tashmë të dalë jashtë funksionit.

Në total janë 40 avionë kinezë dhe sovjetikë në shitje.

Ofertat nisin nga 8.600 dollarë dhe kjo ka bërë që me qindra koleksionistë nga mbarë botën të interesohen për avionët MIG.

“Ishte një surprizë për ne,” tha ministrja e Mbrojtjes, Mimi Kodheli për Associated Press, duke theksuar ‘lumin’ e kërkesave nga SHBA, Gjermania, Franca, Italia dhe vende të tjera.

AP ka intervistuar edhe ish-mekanikun e avionëve, Vasil Jongari, 5vjeç.

“Ka gjithmonë nostalgji. Por nuk mund t’i mbajmë vetëm bazuar tek dëshira. Duhen para dhe ne nuk kemi para”.

Ilirjan Kola, 61 vjeç, që ka fluturuar me këto avionë nga viti 1976 deri në vitin 1991, thotë se avionët ishin gjithmonë të shtrenjtë për të operuar me ta.

“Ishin të kushtueshëm. Një MIG-19 me dy motorë konsumonte 52 litra karburant në minutë. Për një fluturim normal prej 30 ose 40 minutash, imagjinoni kostot”.

Forca ajrore shqiptare u formua në vitin 1951 dhe mori avionë MIG nga Bashkimi Sovjetik deri në vitin 1962.

Më pas, Enver Hoxha u prish me rusët dhe vendi nisi të marrë avionë nga Kina deri në vitin 1977, kur u prishën marrëdhëniet me Kinën.

Rreth 160 pilotë shqiptarë u diplomuan në akademinë e Vlorës dhe fluturonin rreth 80 orë në vit.

Tashmë vetëm 5 janë në shërbim dhe fluturojnë të gjithë me helikopterë.

Kur ra regjimi komunist në vitin 1990, forca ajrore kishte 200 avionë dhe 40 helikopterë, si dhe 14 avionë trasportues IL14.

Shtatë avionë MIG u shkatërruan gjatë vitit 1997.

Kur u kthye rendi, disa avionë nisën të fluturojnë sërish, por një aksident vdekjeprurës në vitin 2004 e vuri në diskutim këtë.

Në vitin 2005 u mbajt një fluturim lamtumire për ta.