Duterte: Koha t’i themi lamtumirë Amerikës

Presidenti i Filipineve, Rodrigo Duterte, është takuar sot me homologun e vet kinez, Xi Jinping, raportojnë mediat lokale.

Lideri i Filipineve është duke kërkuar marrëdhënie më të ngushta me Kinën, duke e kritikuar ashpër aleatin e vet, SHBA-në, transmeton Express.

Dy liderët kanë mbajtur takime zyrtare dhe kanë nënshkruar një seri dokumentesh për bashkëpunim, sipas agjencisë së lajmeve “Xinhua”.

Gjatë një fjalimi para komunitetit filipinas në Pekin, të mbajtur dje, Duterte tha se Filipinet kanë fituar pak nga aleanca e gjatë me SHBA-në, ish-sunduesin e vet kolonial.

“Qëndrimi juaj në vendin tim ishte për përfitimet tuaja. Prandaj, është koha t’ju themi lamtumirë, miq,” tha Duterte, duke iu referuar Shteteve të Bashkuara.

Në anën tjetër, ai tha se Kina është e mirë.

“[Kina] kurrë nuk e ka pushtuar asnjë pjesë të vendit tim gjithë këto gjenerata,” tha ai.