Dy shqiptarë kapen me 1 milionë euro drogë. Ja kush janë

Dy shqiptarë ranë në prangat e policisë italiane pasi në automjetin e tyre u gjetën 3.5 kilogramë kokainë, e një cilësie shumë të pastër.

Të arrestuarit janë B. X., 48 vjeç dhe G. D., 27 vjeç. Ata u ndaluan mbrëmjen e së enjtes në një autostradë në hyrje të qytetit të Venecias. Ajo që kishte ngjallur dyshimet e patrullave rrugore italiane ishin manovrat e çuditshme që kishin bërë shqiptarët sapo kishin vërejtur policinë.

Sipas mediave në vendin fqinj, me shumë gjasë bëhet fjalë për dy korrierë të nivelit të lartë.

27-vjeçari ishte banues në Itali, ndërsa 48-vjeçari kishte vetëm pak javë që kishte mbërritur nga Shqipëria. Të dy janë persona me precedentë penalë.

Mësohet se ata ishin nisur pak orë para arrestimit nga rajoni i Lombardisë dhe po i drejtoheshin Venecias. Bashkë me kokainën, trafikantëve iu sekuestruan edhe 100 mijë euro.

Nëse do të arrinte të hidhej në treg, droga e sekuestruar do të kapte vlerën e rreth 1 milion eurove.