Dyshimi i Hashtag: A po bën Bollino ish-gruan e Edi Ramës?

Ish-bashkëshortja e Kryeministrit Edi Rama, Matilda Makoçi u bë lajm dje në të gjitha mediat online, e cila shprehej në intervistën për Report Tv se Edi Rama ishte shoku i saj i rinisë.

Por, portali ‘Hashtag’ hedh dyshimet nëse aktorja Matilda Makoçi është shprehur vërtetë në këtë mënyrë, pasi në asnjë prej linqeve online të mediave të gazetarit Carlo Bollino, Report Tv dhe Shqiptarja.com, nuk rezulton asnjë deklaratë e tillë në ligjëratë të drejtë.

Shkrimi i portalit Hashtag:

Ish-bashkëshortja e parë e Kryeministrit Rama, Matilda Makoçi, prej disa orësh është shfaqur në një mori portalesh mediatike, të cilat e citojnë për ‘fjalët e zemrës’ që i drejton Kryeministrit me të cilin dikur u divorcua pas një procesi gjyqësor.

“Më vjen mirë që kur mora pjesë në këtë ekspozitë përmendet ish-bashkëshorti im Edi Rama. Ka qenë shoku im i rinisë me të cilin ndamë ëndrrat tona dhe kemi një djalë të mrekullueshëm, Gregun. Tani shoku im i rinisë ndjek rrugën e ëndrrave të tij dhe nuk më mbetet gjë tjetër veçse t’i uroj suksese në misionin e tij”, është shprehur ajo, e intervistuar nga Report tv dhe e transmetuar edhe nga portali ‘Shqiptarja.com, të dyja mediat në pronësi të italianit Karlo Bolino.

Por producentit të ‘Publikus’, Artan Rama, i ka rënë në sy një detaj, për të cilin ka komentuar në profilin e Alba Malltezit, bashkëshortes së Bolinos:

Përshëndetje Alba! Doja t’ju pyesja, pasi lajmi për Matildën, më tërhoqi jo pa shkak. A jeni e sigurt se këto janë fjalët e Matilda Makoçit?! A i ka thënë vërtet Matilda ato çka citohen në ligjëratë të drejtë, si fjalë të sajat, në shkrimin që ju keni postuar? Një prej dyshimeve të mia rrjedh prej faktit, se në linkun që ju sugjeroni (video) mungojnë, pikërisht ato fjalë që në mënyrë propagandistike, orët e fundit, kanë marrë dhenë? Pra, a mos kemi të bëjmë me një gjysmë të vërtetë, të barabartë me dy gënjeshtra?!”

HashtagAL verifikoi videon e postuar nga Shqiptarja.com’ dhe zbardhi intervistën e Matilda Makoçit.

Kjo është intervista e publikuar në portalin ‘Shqiptarja.com’:

M.M.: Është një kënaqësi e madhe për të qenë pranë profesionit, besoj se do jetë kënaqësi edhe për të tjerët.

Pyetje: Do ta quanit këtë një rikthim në skenën e dashur të teatrit, të recitimeve…

M.M.: Është një vazhdim besoj.

Pyetje: Televizioni ynë ju ritransmeton në disa filma tuajt. E ndjek dhe si ju duket vetja në ato vite?

M.M.: Janë nostalgji të ezauruara.

Pyetje: A ka mbetur një dashuri për një art të veçantë, për praktikimin e një roli apo diçka tjetër?

M.M.: Po të kem ndonjë gjë që ja vlen për kushtet që kam unë, me kënaqësi do t’i rikthehesha.

Sikurse shikohet, në intervistë nuk ka asnjë fjalë për Edi Ramën.

Po si ka ndodhur?

Vetë Malltezi jep një shpjegim:

E drejte, kolegia ka bere dhe nje tjeter ku flet per Artin e rikthimin. Mund Ta gjesh ne tjeter link. Deklarimet jane marre te copetuara, gazetarja Dhurata Hamzai e ka pyetur ne momente te ndryshme gjate ekspozites…”

Por në portalin Shqiptarja.com nuk rezulton të ketë një tjetër link me fjalët për Kryeministrin Rama. Ka dy lajme të datës 22 tetor, por vetëm në njërin (atë ku flet për artin) ka linkun me intervistën që kemi zbardhur më sipër, ndërsa në lajmin për Edin si shok të rinisë nuk ka asnjë link me video të intervistës.

Ndoshta Matilda Makoçi i ka thënë vërtet ato fjalë dhe ndoshta në redaksinë e Bolinos ekzistojnë edhe pamjet filmike.

Po përse nuk transmetohen?

Duke cituar edhe një herë producentin Rama, “a mos kemi të bëjmë me një gjysmë të vërtetë, të barabartë me dy gënjeshtra?!” /HashtagAL/