Edhe një rrenë më shumë, nuk është një fitore më shumë për diplomacinë e Kosovës

Shkruan: Prof. Dr. Mehdi Hyseni

Barometri diplomatik

*** -Dikur disa nga rapsodët tanë tëmirënjohur popullorë ( Sali e Feriz Krasniqi, Ramë Bllaca, Tahir Drenica e Hashim Shala) këndonin këngën me motiv patriotik: “gurë mbi gurë ndërtohet kalaja”, kurse sot, këta liderët politikë milionerë e miliarderë po paguhen “majshëm” me euro të arkës buxhetore të qeverisë së Kosovës (2008-2016), po afirmohen, po çmohen, po gradohen dhe po nderohen për mashtrime, për korrupsion, për krim të organizuar, për spekulime dhe për rrenë mbi rrenë po helmatisin popullin, humanizmin, drejtësinë, lirinë, idealin patriotik kombëtar dhe mirëqenien e përgjithshme, vetëm për t’i sunduar dhe shfrytëzuar të tjerët.

Sot, në skenën politike janë ata “horrat” e “maskarenjtë” e Fan S.Nolit, që, me “rrenë mbi rrenë” po luftojnë ta heshtin dhe ta vrasin të vërtetën për Kosovën dhe për Shqipërinë, jo të hedhin ndonjë gur në themelin e ribashkimit të tyre.

*** Sipas kryenegociatores së palës kosovare, Edita Tahiri, Dialogu i Brukselit (2011-2016), “do mbyllet me njohjen e Kosovës nga Serbia”!?( (http://www.botasot.info/aktuale-lajme/595172/tahiri-njohja-nga-serbia-ne-fund-te-dialogut/.)

*** Edhe kjo deklaratë e Edita Tahirit, nuk është diç e re dhe origjinale, por vetëm “reprizë” e Deklaratës së 27 shtatorit të vitit 2015, e pohuar nga ish-presidentja e Kosovës, Atifete Jahjaga, e cila po në “stilin” e Ministres Edita Tahiri, pat thënë : “Serbia do ta njohë Kosovën, nuk ka alternativë tjetër përveç njohjes së pavarësisë. Kjo do të ndodhë pas përfundimit të dialogut në Bruksel. Kjo nuk është ëndërr.” (http://kosova-sot.info/opinione/37509/kur-beogradi-ta-njohe-republiken-e-kosoves-jahajaga-nuk-do-te-jete-presidente-e-kosoves/ ).

Mos e rreni popullin më tej, se e keni tepruar (2008-2016)!

E vërteta, së shpejti do të dalë në shesh, se Serbia as në mbylljen e dialogut në Bruksel, nuk do ta njohë pavarësinë e Kosovës. Këtë le ta mbajnë mirë në mend, ata që po e gënjejnë të kundërtën, ashtu sikurse me rastin e fillimit të këtij dialogu, duke e cilësuar “vetëm me përmbajtje tenkie”, kurse më pas (jo më pak se 6 vjet) na doli “dardhë me bisht” me makro kërkesa politike, ekonomike, tregtare dhe territoriale. Ndër të tjera, këtë e dëshmon edhe formimi i “Srpska zajednicës”, si dhe kërkesat e tjera të Beogradit në moslejimin e demarkacionit të kufjve shtetërorë të Kosovës me Serbinë. Kërkesat për “Trepçën” dhe për “Gazivodën” …etj.

-Po, sikur të ishte ashtu, nuk do bëhej kurrfarë dialogu në Bruksel, sepse ajo “ceremoni” ligjore, do kryhej në Beograd. Gjithashtu, po të ekzistone ndonjë dozë vullneti dhe disponimi i qarqeve zyrtare të Serbisë, as Tomislav Nikoliqi (president) e as Aleksandar Vuçiqi (keryeministër) nuk do të kërkonin që në dialogun e Brukselit, të debatohej edhe për “Trepçën”

E njëjta këngë si e Atifetes

*** Ministrja e qeverisë së Kosovës, Edita Tahiri(kryedrejtuese e delegacionit kosovar në dialogun Kosovë – Serbi në Bruksel, 2011-2016) ka deklaruar se “: Njohja e Kosovës nga Serbia, do bëhet në fund të dialogut”. (http://www.botasot.info/aktuale-lajme/595172/tahiri-njohja-nga-serbia-ne-fund-te-dialogut/.

Do t’i kisha besuar kësaj deklarate propagandistike sikur Edita Tahiri, gjatë 6-vjeçarit të shkuar në dialogun me palën serbe të Beogradit në Bruksel(2011-2016), të mos kishte gënjyer disa herë rresht, ashtu sikurse kryeministri i saj Hashim Thaçi (aktualisht president i Kosovës) se gjoja “Serbia de fkato dhe de jure e ka njohur Kosovën” pas nënshkrimit të disa marrëveshje për transport, për energji… etj. Shih burimet në: http://www.telegrafi.com/tahiri-serbia-e-ka-njohur-kosoven/ dhe http://lajm.co/edita-tahiri-prap-deklaron-se-serbia-e-ka-njohur-kosoven/).

Mirëpo, me gjithë këtë gënjeshtër të qeveritarëve të Kosovës, Serbia as de fakto e as de jure nuk e ka njohur Republikën e Kosovës. Për këtë qëllim Beogradi zyrtar, edhe po zhvillon dialogim me palën kosovare në Bruksel (2011-2016).
Rrena më e madhe

Që në fillim të dialogimit me palën serbe të Beogradit në Bruksel (2011), Edit Tahiri gënjeu dhe e mashtroi opinion e gjerë politik vendor dhe atë ndërkombëtar, duke deklaruar se “ Dialogu i nisur ndërmjet Prishtinës dhe Beogradit, është teknik dhe i tillë do të mbetet deri në fund”.(Shih burimin në: http://www.evropaelire.org/a/3551961.html ).

Këtë deklaratë të rreme të E.Tahirit, se bisedimet me Serbinë kishin “vetëm karakter teknik”, e përgënjeshtroi përmbajtja politike e dialogut me Serbinë, i cili po zhvillohet qe gjashtë vjet në Bruksel nën patronatin e BE-së.

Përpos gënjeshtrvae dhe dezinfomimit të deritashëm gjashtëvjeçar politik dhe diplomatik, se qeveria e Kosovës po zhvillon “vetëm dialog teknik” (2011-2016), tani, Edita Tahiri ka pohuar një rrenë më të re në stilin e “pinpong diplomacisë” kineze, se përfundimi i Dialogut (kohëzgjatgjen e të cilit askush nuk mund ta ketë parashikuar) në Bruksel, do të përfundojë me “njohjen e Kosovës nga Serbia”!?

Çfarë naiviteti politik e diplomatik, po sikur një dialogim i tillë, të ishte në funksion të njohjes së Republikës së Kosovës nga Serbia, Beogradi zyrtar fare nuk do ta kishte ngritur atë dialog, por Kosovën do ta njihte, pa vajtur në Bruksel, ashtu sikurse 113 shtete të tjera, të cilat deri tani e kanë njohur Kosovën (2008-2016).

Meqë prej fillimit të hapjes së atij dialogu, si qeveria, si kuvendi, ashtu edhe presidenca e Kosovës e kanë ditur (sepse vetë e kanë përqafuar dhe nënshkruar deklarata dhe rezoluta për mbajtjen e tij, ashtu siç ka diktuar dhe imponuar interesi nacional, ekonomik, tregtar dhe gjepolitik shtetëror i Serbisë kolonialiste dhe hegjemonist), se ai krejtësisht kishte karakter politik dhe diploamtik (jo” vetëm teknik” siç ka deklaruar rrejshëm kryenegociatorja E. Tahiri) për të vënë në pikëpyetje statusin e pavarësisë së Kosovës, të njohur më 17 shkurt 2008.

Sa më sipër, nëse epilogu i procesit të Brukselit, do të sillte njohjen e pavarësisë së Kosovës nga ana e Serbisë, atëherë, unë, do propozoja, që Edita Tahiri, të zgjedhej presidente e Kosovës me mandat të përhershëm (pa rizgjedhje, sikurse Tito dikur në RSFJ-në e tij).

Por, 1000% jam i sigurt, se një gjë e tillë nuk do të ndodhë në përmbylljen e Dialogut të Brukselit (2011-2016).