“Edhe ushtria për të shkatërruar kanabisin!” Si e pret PD-ja dhe çfarë mendon kryeministri Rama

Ministri i Drejtësisë Ylli Manjani tha se nëse është e nevojshme në luftën kundër kanabisit duhet të ndërhyjë edhe ushtria. Demokratët duket se e kanë mirëpritur këtë deklaratë.

Madje për ish-ministrin e Brendshëm Falmur Noka, ndërhyrja duhej të ishte bërë me kohë. Në një intervistë për Ora News, deputeti demokrat Flamur Noka tha se lufta ndaj kultivimit të lëndëve narkotike i ka dalë jashtë kontrollit policisë së shtetit.

“Unë dua ta përshëndes deklaratën e ministrit sepse përpos faktit që ai pranon kanabizimin e vendit kërkon ose rekomandon një mënyrë për të dalë nga kjo situatë. Deklarata e Manjanit pasqyron realitetin. A duhet të ndërhyjë ushtria apo jo? Nuk zgjidhet gjithçka me ushtri. Ushtria duhet të ndërhynte pak më parë, por nuk zgjidh çdo gjë ndërhyrja e ushtrisë. Sepse kjo çështje nuk është thjesht se u ka dalë jashtë kontrollit institucioneve qeveritare, ose konkretisht policisë së shtetit. Këta janë organizuesit e gjithçkaje që sot quhet kanabizim dhe vendi do marrë emrin një term që quhet “kanabista”, nuk është më Shqipëri. Nuk e zgjidh ushtria sepse është vullnet politik. Është alarmante dhe e frikshme të mendosh që kjo qeveri ka gjetur si zgjidhje për të zbutur varfërinë drogën. E them këtë sepse nga të gjitha informacionet që ka opozita të gjitha grupet kriminale kanë lidhje të mirëfillta policore dhe politike. Si cdo grupe kriminal 30-40% shkon tek një drejtues policie deri tek ministri. Këtë nuk e themi vetëm ne, por edhe mediat ndërkombëtare. Një emision që bëri Rai3, doli me zë dhe figurë kjo që opozita ka thënë kaq kohësh. Çështja e farës vietnameze që  ne e kemi thënë para 6 muajsh u pranua edhe nga GDF u pranua edhe nga policia e shtetit. Sipërfaqe të tëra janë korrur nga 2 deri në 3 herë, ky është informacioni  GDF. Alarmi që dha prokurori ishte shumë i madh. Sasi të mëdha si asnjëherë tjetër po vijnë drejt italisë”, tha Noka.

I një mendimi tjetër është shfaqur kryeministri Edi Rama. Gjatë emisionit “Studio e Hapur” në News 24, Rama tha se deklarata e ministrit Manjani është thjesht një opinion pasi sipas tij problem nuk është shkatërrimi i parcelave me kanabis.

“Ne i kemi hapur luftë frontale këtij fenomeni. Ky është një opinion, ka dhe opinione të tjera, por këtu problemi nuk është shkatërrimi. problemi është parandalimi dhe nuk kemi pse të humbim më kohë se më duket se edhe ti je e afasionuar nga kjo ideja e Kolumbisë dhe e gazetarëve dhe këngëtarëve të përfshirë në këtë rrethin ku është politika ku është vënë droga, e ke parasysh me atë muzikën salsa”, tha Rama.