Eduard Selami sulmon Metën për çamët

Deputeti demokrat Eduard Selami e ka quajtur të turpshëm reagimin e kryeparlamentarit Ilir Meta, dje në Athinë për çështjen çame, teksa u takua me ministrin e Jashtëm të vendit fqinj, Nikos Kotzias.

Në një postim në rrjetet sociale, Selami ka “sulmuar” Metën, për qëndrimin e mbajtur gjatë vizitës zyrtare, pikërisht për një cështje shumë sensitive, që së fundi është bërë temë e një tensioni të ri politik, tashmë jo mes Shqipërisë dhe Greqisë, por mes saj dhe BE-së.

“BE njeh çështjen çame, kryetari i Kuvendit ngushëllon Greqinë. Turp”- shkruan Selami.

Dje, Meta në Athinë pyetur për çështjen çame u shpreh: “Unë besoj se ne jemi në një proces shumë pozitiv të përafrimit të qëndrimeve për shumë çështje të ndryshme të trashëguara nga e kaluara, ku do të doja të veçoja sidomos çështjen e rishikimit të historisë dhe të teksteve të historisë. Në këtë kuadër unë besoj se për çështjen ‘çame’ që ju pyetët, ekzistojnë ende dy qasje të ndryshme le të themi, por unë besoj se me durim dhe mënyrë konstruktive, ne kemi mundësi të ecim për gjithë problemet e së kaluarës drejt një zgjidhjeje ku përfitojnë të dy vendet tona dhe të dy popujt tanë”.