Erdogan: Harrojeni të na përjashtoni nga beteja kundër ISIS-it në Mosul

Presidenti turk, Recep Tayyip Erdogan paralajmëroi se ishte “jashtë çdo diskutimi” që Turqia të qëndronte e distancuar nga operacioni i drejtuar nga Bagdadi për të rimarrë Mosulin, fortesë e grupit të Shtetit Islamik në veri të Irakut.

“Ne do të jemi pjesë e operacionit. Mbetet jashtë çdo diskutimi që të qëndrojmë të distancuar nga ky mision mjaft i rëndësishëm”, deklaroi Erdogan gjatë një fjalimi televiziv në Stamboll, disa orë pas fillimit nga ana e Bagdadit të ofensivës për të rimarrë kontrollin e qytetit të dytë më të madh të Irakut, nën drejtimin e ISIS-it prej qershorit të 2014.

Përgatitjet në pikëpamje të këtij operacioni u shënuan me tensione të larta midis Bagdadit dhe Ankarasë që vuri theksin për të qënë pjesëmarrëse në ofensivë, ndërsa qeveria irakiane e shikon këtë hap në një këndvështrim aspak pozitiv.

“Cfarë thanë ata ? Që Turqia të mos hyjë në Mosul. Ndajmë një vijë të përbashkët kufitare me Irakun prej 350 kilometrash. Ndihem mjaft i kërcënuar në këtë aspekt”, u shpreh sot Erdogan duke shtuar se ”në Mosul ndodhen vëllezërit tanë arabë, turkmenë dhe ata kurdë”.

Tre ditë më parë, Erdogan kërcënoi se do të vinte në zbatim “planin B” nëse ushtria turke nuk do të ishte pjesëmarrëse në këtë ofensivë, pa dalë në qëndrime konkrete në lidhje me masat e mundshme të parashikuara.