Facebook mbyll profilet e adhuruesve të kriminelëve serbë të luftës

Rrjeti Facebook ka mbyllur përkohësisht profilet e një numri të madh të përdoruesve të këtij rrjeti që kanë publikuar fotografi të kriminelëve të luftës Ratko Mlladiq dhe Radovan Karaxhiq, raporton gazeta beogradase “Veçernje Novosti”.

Administratori i rrjetit më të madh shoqëror ka vlerësuar se fotografitë e këtyre dy kriminelëve të luftës “përhapin urrejtje dhe mosdurim”.

Disa lexues të gazetës janë ankuar se u janë mbyllur profilet, për shkak se kishin publikuar fotografi me portretet e Mlladiqit e Karaxhiqit, pa asnjë diçiturë apo koment shoqërues.

Midis profileve të suspenduara ka qenë edhe ai i një burri që e kishte publikuar fotografinë e një tatuazhi me protretin e kriminelit famëkeq serb, Ratko Mlladiq.

“Na kanë censuruar, për shembull, vetëm për shkak se në faqen e Facebook-ut të portalit ‘Srbin.info’ kemi shpërndarë tekstin gazetaresk për gjykimin e Ratko Mlladiqit”, ka thënë Dejan Zllatanoviq, adminsitrator i faqes së këtij portali serb dhe faqes “Fan klubi Vladimir Putin”.

“A do të thotë kjo se ky rrjet shoqëror faktikisht ka të drejtë të shuajë të gjitha faqet e medieve të Serbisë në Fecabook që ndonjëherë kanë raportuar për Karaxhiqin dhe Mlladiqin?”, është ankuar administratori serb.

Ai ka shpjeguar se së pari është njoftuar për suspendim të përkohshëm, kurse më vonë është informuar edhe për mbylljen e faqes, për shkak të publikimit të një statusi me fotografinë e “Engjullit të Bardhë”, freskës së njohur të Manastirit të Mileshevës, në Serbi.

Gazeta shkruan se është përpjekur ta kontaktojë administratorin e Facebook-ut, por ka marrë përgjigjen se çështjen mund ta shtrojë vetëm publikisht, nëpërmjet profilit të gazetës në Facebook.

Facebook suspendon profilet e përdoruesve të tij më së shpeshti pas vërejtjeve e paralajmërimeve të përdoruesve të tjerë. Në qoftë se përdoruese ka publikuar për herë të parë ndonjë përmbajtje të papërshtatshme, Facebook së pari ia tërheq vërejtjen përdoruesit dhe i kërkon të heqë publikimet e tilla. Në rast se përdoruesi nuk e bën këtë, profili i përdoruesit bllokohet një ditë. Në rastet kur shkeljet e tilla pëesëriten, Facebooku suspendon profilin deri në një muaj./ Iliria