Familja me bombola gazi në duar: Ja pse do hedhim veten në erë

Një familje në Milot ndodhet në situatë të vështirë ekonomike dhe në mëshirë të fatit, pasi banesa e tyre është përmbytur 10 ditë më parë dhe ende nuk mund të futen brenda saj.

Në shenjë proteste, gjashtë anëtarët e familjes Lleshi dolën dje në rrugë. Me dy bombola gazi në dorë dhe një shkrepëse, ata kërcënuan se do të vetëflijohen, duke hedhur veten në erë, raporton “Panorama”.

Vërshimi i përroit u përmbyti banesën, duke u marrë me vete çfarë kishin. Por ndonëse kanë kaluar 10 ditë nga përmbytja, në banesën e tyre ende ka ujë, duke bërë që pjesëtarët e kësaj familjeje të jetojnë te fqinjët. Në këto kushte dy bombolat dhe pak ndërresa i nxorën në oborr për të tërhequr vëmendje.

Kryefamiljarja Marie Lleshi kërcënoi se do t’i shpërthente pasi askush nuk u ka ardhur në ndihmë gjatë këtyre ditëve, duke i lënë në mëshirë të fatit.

“Maria është vjehrra ime. Së bashku me pjesëtarët e tjerë të familjes kemi dalë në rrugë dhe kemi nxjerrë të gjitha rrobat. Ajo mori edhe dy bombola gazi me vete për t’u vetëflijuar. U bënë 10 ditë që na ka hyrë uji në banesë, duke na shkatërruar gjithçka. Shtëpia ka ende ujë brenda dhe është bërë e pabanueshme. Prej ditësh ne jemi strehuar te të afërmit tanë, pasi nuk kemi ku të fusim kokën. Asnjë përfaqësues i pushtetit nuk ka ardhur për ta parë gjendjen tonë. Kjo është e papranueshme”, shprehet Zana Lleshi.

Pjesëtarët e familjes Lleshi kanë qëndruar për një orë në mes të rrugës, duke kërcënuar se do t’i japin fund jetës. Menjëherë në vendin e ngjarjes kanë mbërritur forcat e policisë, të cilët kanë nisur negociatat për të bindur kryefamiljaren që të mos i shpërthente bombolat e gazit. Blutë bënë të ditur se kanë shoqëruar në komisariat Marie Lleshin, e cila tentoi që t’i jepte fund jetës së saj dhe të familjarëve nëpërmjet bombolave të rrezikshme.

PERMBYTJET

Reshjet e dendura të shiut të rëna gjatë natës të së martës kanë sjellë sërish përmbytje në disa zona të Lezhës. Situata më problematike ka qenë brenda qytetit dhe në Njësitë Administrative Zejmen dhe Blinisht. Në fshatin Gajush disa banesa u përmbytën nga vërshimi i ujit, i cili arriti në 50 cm, ndërsa e vetmja mënyrë për të lëvizur ishte me not.

Banoret thonë se kjo situatë përsëritet sa herë që ka reshje shiu, ndërsa, sipas tyre, asnjë përfaqësues i Bashkisë apo Qeverisë nuk ka shkuar për ta parë gjendjen, e cila krijohet nga bllokimi i një turbine shkarkimi pranë superstradës. Reshjet e shiut përmbytën qindra hektarë tokë bujqësore edhe në Njësinë Administrative të Blinishtit.

Administratori i kësaj zone, Sokol Luku, thotë se përmbytja ka ardhur si pasojë e bllokimit të kanaleve kulluese, ndërsa i bën apel qeverisë që të alokojë fonde për të ndërhyrë. Vërshimi i përrenjve malorë përmbyti sërish edhe qytetin e Lezhës.

Ashtu si dhe herët e tjera, blloqet e banimit “11 janari”, si dhe oborret e shkollave u përmbytën sërish. Niveli i ujit arriti në 30 cm, duke bllokuar hyrjet e pallateve, e për pasojë duke vështirësuar lëvizjen e qytetarëve./panorama