Fatos Klosi kundër Servet Pëllumbit: PS dhe LSI s’fitojnë të ndara

Ish-shefi i SHISH-it, Fatos Klosi, mbështet ligjin për importin e mbetjeve, ndërsa akuzon opozitën se po bën politikë me mbetjet. Në një intervistë për gazetën “Panorama”, Klosi shprehet se nuk është aq e lehtë të importosh plehra në Shqipëri kur kjo ndalohet me ligj, ndërsa mbetjet radioaktive i cilëson të pamundura që të hyjnë në Shqipëri bashkë me mbetjet e riciklueshme.

Ai kundërshton analistin Mustafa Nano, i cili kërkonte largimin e Edi Ramës nga Kryeministër si të kapur nga mafia e plehrave. Për Klosin, Nano duhet të japë argumente dhe fakte për akuzat që bën. Klosi është kundër edhe profesor Servet Pëllumbit që kërkon prishjen e aleancës së PS-së me LSI-në. Klosi shprehet se PS dhe LSI duhet të qeverisin bashkë, sepse të vetme ato nuk fitojnë dot.

A shikoni ndonjë rrezik nga importimi i mbetjeve? Unë e dëgjova me vëmendje Kryeministrin në takimin që bëri me shoqatën e ricikluesve, por edhe shpjegimet që ka dhënë këto ditë dhe më është dukur bindës. Domethënë, ne kërkojmë të sjellim lëndë të parë për industritë ricikluese. Kjo lëndë e parë ndahet në disa kategori, katër kategori, si mund të hyjnë të tjera? Në qoftë se ato kontrollohen në doganë, nuk është e mundur të vijnë mbetje të tjera. Se ka shumë pikëpyetje. Kush do t’i dërgonte mbetjet e rrezikshme, p.sh. brenda një dengu me mbetje të riciklueshme, letër apo karton, çfarë do të fusnin? Kam dëgjuar këto ditë gjithfarë idesh, si p.sh. ne nuk e ruajmë dot drogën, po vijnë ta marrin me avion, por avionët mund të sjellin mbetje të rrezikshme dhe të marrin drogën!!! Të transportosh mbetje me avion, kjo është një çmenduri.

Rreziku është që bashkë me mbetjet e riciklueshme të vijnë dhe mbetje të rrezikshme. A ka një rrezik në këtë rast?

Jo nuk e besoj, të fusësh brenda një dengu me mbetje të riciklueshme, që ka volumin 1 metër herë 1 metër, çfarë mund të fusësh, 10 kilogramë mbetje të rrezikshme? Kjo nuk është e lehtë sepse edhe kushton. Pastaj, çfarë kuptojmë me mbetje të rrezikshme? Askush nuk do ta thotë.

Flitet se mund të ketë mbetje radioaktive…

Nuk mund të transportohen kaq kollaj mbetjet radioaktive. Nuk i lë njeri mbetjet radioaktive të transportohen si plehrat. Mbetjet radioaktive janë një industri më vete. Kush ka reaktor bërthamor, të cilët janë prodhues të mbetjeve radioaktive, kanë kontrata me kompani të mëdha shumë të specializuara, të cilat i fusin në tunele në kushte shumë speciale dhe nuk i lë njeri sheshit që të ngatërrohen me kartonët dhe plastikën që do të vijë këtu. Por unë shoh që e gjithë kjo histori po shfrytëzohet për luftë politike. Kaq e thjeshtë është. Për mua, Partia Demokratike nuk është e zonja të japë një alternativë, të japë shifra për të treguar se ka ndërruar mendje nga ato sjellje dhe politika për të cilat iku nga pushteti. Në mungesë të kësaj po kapet me drogën, jo pse për drogën nuk ka të drejtë të shqetësohet, por nuk mund të jetë kjo lufta politike. Lufta politike nuk bëhet duke sharë, unë do të doja një betejë politike me ballafaqime alternativash që të ishte e besueshme. Është bajate fare. Unë e pyes, pse nuk e ndalove 100% kultivimin e kanabisit në Shqipëri kur ishe 8 vjet në pushtet? Tani lufta politike ka zbritur te plehrat. Por populli nuk harron se tre vjet më parë ajo e miratoi një ligj shumë të pakontrolluar për importin e mbetjeve të riciklueshme në Shqipëri. Lërjani ambientalistëve nëse kanë ndonjë mendim për të shprehur, jo ta bëjë PD-ja këtë kur ka dhe një precedent të vetin dhe guxon të ngrihet mbi atë që miratoi vetë tre vjet më parë.

Qeveria justifikohet me faktin se biznesi i riciklimit po shkonte drejt falimentimit…

Biznesit të riciklimit unë do t’i bëja një pyetje: Si keni investuar ju kaq miliona euro pa pasur një kuadër ligjor që do t’ju mbështeste në aktivitetin tuaj? Mua ky argument nuk më duket bindës. Kanë bërë investime, siç thuhet, në rreth 250 milionë euro dhe ndërkohë nuk ka pasur një ligj që do t’u mundësonte atyre sigurimin e lëndës së parë për të punuar. Pasi kanë përfunduar këtë investim, kërkojnë ligj sepse u nevojitet lëndë e parë! Ç’është ky biznes që harxhoka miliona pa pasur sigurinë nëse do punojë ose jo, tjetër nëse do dalë me fitim apo jo, por të sigurojë në radhë të parë punën, ekzistencën. Më duket pak e çuditshme.

Ju lë hije dyshimi fakti se e njëjta maxhorancë në fillimet e saj e bllokoi ligjin dhe tani në fund të mandatit e lejon?

Jo, jo, ai ligj ashtu siç ishte formuluar, i hapte rrugë importit të plehrave dhe unë quaj plehra ato që digjen, të cilat nuk kanë asnjë vlerë apo funksion tjetër. Por nuk mund të djegësh gomën, plastmasin, sepse bëhen edhe më të dëmshme gjatë djegies. Djegia nuk është ndonjë veprim i mençur në lidhje me ambientin edhe pse me djegien e tyre mund të përfitohet energji elektrike. Edhe depozitimi në këto ladfille nuk është aq i mirë, sepse ai është një varr që nesër-pasnesër mund të shkaktojë ndonjë rrjedhje që të dëmtojë tokën dhe burimet nënujore. Nga kjo pikëpamje, plehrat janë siklet për shoqërinë, sepse kushton shumë që ta sigurosh atë për të pasur një mjedis sa më të pastër. Ndërsa këto plehra që ndahen që në origjinë në alumin, dru, letër dhe plastikë, unë nuk do ta quaja më plehër, por lëndë të parë e një niveli më të ulët. Nuk shoh asgjë të keqe këtu.

Mustafa Nano ka akuzuar Kryeministrin se po u shërben interesave të klaneve korruptive dhe ka kërkuar largimin e tij nga vetë socialistët nga posti i Kryeministrit. Ju duket bindës ky apel?

Të bësh një akuzë të tillë, mua personalisht më duket shumë e rëndë. Jo se nuk mund ta bëj edhe vetë, por unë do të doja më shumë argumente dhe fakte që akuza të qëndrojë, kush janë grupet e interesit etj., etj. Nëse ti e merr me mend një gjë të tillë, nuk mund të kërkosh largimin e Kryeministrit nga një hamendësi. Do ta dëgjoja me shumë respekt nëse do të thoshte që ky grup interesi ka vënë në lëvizje Kryeministrin për të lejuar importin e mbetjeve në Shqipëri. Nuk besoj se do të lejojë njeri të digjen plehra në Shqipëri, sepse është një gjë që kuptohet menjëherë nga vetë qytetarët. Nëse do të shkelet ky ligj në praktikë, atëherë diku ato do të çohen për t’u djegur. Kjo gjë do të merret vesh nga komuniteti lokal ku do të ndërtohet një incerenator. Pra nuk ka shans që të digjen plehrat e huaja në Shqipëri.

Leje për impiante djegiesh të plehrave janë dhënë për në Elbasan dhe në Fier, të cilët do të prodhojnë edhe energji elektrike…

Po ato do të djegin plehrat e vendit. Nëse do të importohen plehra për djegie, ato nuk futen në një çantë apo në një kamion, sepse interesi është të transportohen dhe digjen në sasi të mëdha, bota i transporton me trena dhe me anije. Kjo nuk fshihet lehtë. Por unë shoh që ligji është shumë i qartë.

Profesor Servet Pëllumbi është shprehur pak kohë më parë se pa LSI-në PS është më e çliruar dhe i fiton e vetme zgjedhjet, madje prezenca e LSI-së i prish punë te votuesit. Ndani dhe ju të njëjtin qëndrim?

Unë e shoh të gabuar këtë deklaratë të profesor Pëllumbit, sepse as PS dhe as LSI nuk kanë këllqe që ta marrin pushtetin të vetme. Shyqyr që ato u treguan të arsyeshme, që gjetën rrugën e kompromisit, i cili për mua është i arsyeshëm, sepse ato mbahen si forca të majta, ndërsa kompromisi mes LSI-së dhe PD-së më duket i paarsyeshëm, është një kompromis interesash, afatshkurtër. Me thënë të drejtën, kam dhe dëshirën që këto dy forca të jenë bashkë si parti me orientim të majtë.

PS nuk fiton dot pa LSI-në?

Nuk fiton dot. Rezultati i zgjedhjeve të kaluara ishte i mirë për Partinë Socialiste, u bë një propagandë shumë e madhe, u hodhën në treg alternativa, Rilindja dhe ja ku jemi. PS ka 56 deputetë dhe janë fare të pamjaftueshëm për të qeverisur më vete. LSI ka një numër jo të vogël deputetësh, 20, janë dhe çamët, kanë dhe ata 5 deputetë. Por vetëm është e vështirë. Bashkë e bëjnë qeverisjen më solide. Deri tani ajo ka qenë e qëndrueshme, pavarësisht se mediat tentojnë t’i shohin ata të inatosur, të përçarë, por unë i shoh lëvizjet, si të Metës dhe të Ramës, të mençura për ta mbajtur këtë koalicion. Pa këtë aleancë, as njëri dhe as tjetri nuk do të jenë kaq të rëndë- sishëm sa janë sot.

Intervistën e plotë marrë nga ARISTIR LUMEZI /Panorama/