FOTO/ Aksidenti tragjik, momenti kur policët dorëzojnë sendet personale të 4 viktimave

TIRANË- BalkanWeb ka siguruar sot fotot e momentit kur policët e Durrësit iu dorëzojnë familjarëve të 4 viktimave të aksidentit tragjik në Sukth sendet e tyre personale.

Ndërsa sot në media ka dalë dëshmia e kushërirës së Greta Sherifit e cila kërkon që familjarëve të së ndjerës t’i kthehen dy celularët Iphone, me pretendimin se aty kanë fotot dhe kujtimet nga Greta, BalkanWeb publikon fotot e momentit kur policët e Durrësit dorëzojnë sendet personale të vajzave.

Gazetarja Klodiana Haxhiaj ka mundur të sigurojë për BalkanWeb fotot kur policët mbajnë në duar sendet personale të tre shoqeve të ngushta, të cilat humbën jetën nga përplasja kokë me kokë me mjetin me targë AA 979 GV, me drejtues shtetasin Dashnor Deliallisi. Ky i fundit lëvizte në sens të kundërt dhe me shpejtësi të marramendëse, çka e ka bërë edhe më fatale përplasjen e dy makinave.

Po sipas të njëjtave burime policët kanë konfirmuar se kanë dorëzuar tek të afërmit çdo gjë që kanë gjetur në makinën me targa AA 694 IL, ku udhëtonin tre vajzat, ndërsa nuk dinë asgjë për fatin e telefonave të humbur.