FOTO/ Meta në Kinë, nënshkruhet memorandumi për menaxhimin e integruar të ujërave

Në kuadër të vizitës zyrtare në Kinë, kryetari i Kuvendit, Ilir Meta është takuar me Ministrin e Burimeve Ujore të Kinës, Chen Lei. Në këtë takim është nënshkruar memorandumi i bashkëpunimit midis Ministrisë së Burimeve Ujore të Republikës Popullore të Kinës dhe Ministrisë së Bujqësisë dhe Zhvillimit Rural të Republikës së Shqipërisë në fushën e administrimit dhe menaxhimit të integruar të ujërave.

“Përvoja e palës kineze në fushën e bujqësisë dhe administrimit të ujërave është shumë e dobishme për Shqipërinë, një vend me burime të shumta ujore dhe me prioritet kryesor për zhvillimin e bujqësisë”, ka thënë Meta.

Ndërsa, ministri i Bujqësisë Edmond Panariti si pjesë e delegacionit shqiptar atje, ka kërkuar nga pala kineze një grup ekspertësh për të vlerësuar situatën e menaxhimit të burimeve ujore në vendin tonë dhe për të ndërmarrë hapat konkretë në zbatimin e memorandumin i cili u nënshkrua sot nga të dyja palët.

Në vijim të vizitës Meta është takuar edhe me n/kryetaren e Shoqatës së Kinës për Marrëdhënie Miqësore Ndërkombëtare, Deng Rong, vajza e ish-liderit, Deng Xiaoping.

Gjatë takimit kreu i Kuvendit i ka dhuruar Rong librin e saj “Deng Xiaoping dhe Revolucioni Kulturor” të përkthyer në gjuhën shqipe. Për Rong, përkthimi i librit të saj në gjuhën shqipe pasqyron miqësinë midis dy vendeve.