Galdini debaton direkt me Ramën: Shëndetësia është skandaloze dhe ky quhet Dështim

Arian Galdini, kryetari i partisë për Liri, Demokraci dhe Etikë, ka debatuar direkt me Kryeministrin Edi Rama në faqen e këtij të fundit në Fb.

Ndërsa Rama promovon sukseset në shëndetësi, sidomos duke bërë krahasime me të kaluarën, Galdini, njëherësh pedagog, i komenton nën videon reklamuese me këto fjalë:

“Edi, kur ti shkruan për shëndetësinë e sidomos per ta paraqitur si histori suksesi, mua me duket sikur merr përsipër të thuash “mizerjen, po ta veshësh me dekolte, edhe mund ta kalosh për seksi”.

Për shkak të një beteje të gjatë që kam bërë unë personalisht, jo politikisht, e theksoj, por personalisht, kunder mizorisë së sistemit shëndetësor shqiptar, kam arritur të kuptoj e zbuloj vërtetësinë e lakuriqtë që nuk e “dekoltojnë as 3 P-të e Ilir Beqajt e as këto “shpinëbartjet” propagandistike që po i bën ti.

Nuk reformohet shëndetësia me dekolte prej 3 P e as me tenderime të trukuara. Shërbimi është skandaloz. Farmaceutika është katastrofë. Skema që ke zgjedhur ka dështuar. As falas nuk e bën dot shëndetësinë e as më të mirë, me këtë ministër e me këtë mendësi e strategji.

Nuk po bëj krahasime si ishte dje në kohën e Saliut e sesi është sot… Nuk më intereson fare propaganda krahasimore. Por po të them se kjo strategji që ke ti është dekolte që e bën mizerjen jo seksi, por edhe të përqeshur. Dhe ky quhet dështim,” thekson Galdini në përfundim.

Pedagogu i njohur vazhdon kështu betejën e tij të denoncimeve publike sidomos në shëndetësi pas përvojës së hidhur që pati me të afërmin e tij shtruar në Onkologjik për mjekimet që pretendoheshin se i bëheshin të sëmurit.