Gjyqi/ Qytetari blen BMW X5, por kilometrazhi ishte manupuluar

Gjykata e Tiranës ka urdhëruar prokurorinë të rihapë hetimet në lidhje me shit-blerjen e një autoveture “BMW X5”, të cilës dyshohet t’i jenë manipuluar numëruesi i kilometrave të kryera.

Historia ka nisur në shkurt të vitit 2016 kur shtetasi B. A. ka kallëzuar për “mashtrim” dy persona, të cilët i kishin shitur një automjet “BMW X5” në shumën 22 mijë euro.

Në kallëzim B. A. ka pretenduar se në njoftimin e shitjes së makinës, të publikuar në një faqe shitjesh online, thuhej se mjeti kishte kryer 140 mijë kilometra. E njëjta shifër shënohej dhe në kruskotin e mjetit.

Pak ditë pas blerjes së kryer para një noteri, pronari i ri ka vënë re se në një akt-kolaudimi të automjetit të muajit shkurt 2015 thuhej se në atë kohë mjeti kishte 232 mijë kilometra të kryera.

Ai ka kontaktuar shitësin e mjetit, I. J., i cili i ka thënë se nuk ka kryer ndërhyrje në kruskot. Pas verifikimeve që ka bërë tek koncesionari B. A. ka mësuar se deri në mars 2013 mjeti rezultonte me 167 mijë kilometër.

Në këto kushte ai ish-pronarit të mjetit, anulimin e kontratës, me pretendimin se ishte parashuikuar që në rast mospërputhjeje dokumentacioni dhe të dhënave faktitke, palët ktheheshin në gjendjen e mëparshme.

Ky i fundit nuk ka pranuar, duke ngritur pretendimin se nuk kishte para për të kthyer. Prokuroria, në përfundim të veprimeve hetimore vendosi mosfillimin e procedimit penale, me arsyetimin se nuk kishte elementë të veprës penale.

Vendimi i mosfillimit është kundërshtuar në gjykatë nga ana e B. A. Pak ditë më parë, Gjykata e Tiranës pranoi këtë kërkesë duke urdhëruar prokurorinë të vijojë hetimet për rastin. Sipas gjykatës, hetimi i kryer nga organi i akuzës nuk ka qenë i plotë.

Në të njëjtin vendim gjykata jepte disa detyra për prokurorinë, mes të cilave edhe kryerjen e një ballafaqimi mes blerësit dhe shitësit të mjetit.