Grabitësit e argjendarisë përdorën “skemën e bankës”, çanë murin ngjitur dhe morën rreth 500 mijë euro mall

Një argjendari në Tiranë ka rënë pre e grabitësve dje gjatë në orët e para të mëngjesit, ku autorët kanë mundur të marrin prej andej gjithçka ndodhej në dyqan, shuma e të cilave arrin në rreth 500 mijë euro. Ngjarja u shënua rreth orës 04:00, ndërsa rasti është konstatuar në orën 8 të mëngjesit nga shitësja.

Mësohet se dyqani i bizhuterive, i ndodhur në zonën e Pazarit të Ri, në rrugën “Luigj Gurakuqi” është në pronësi të Pavllo Shkarpa. Kjo argjendari është grabitur edhe dy herë të tjera. Një herë në vitin 2012 dhe një herë para 3 muajve. Në 2012 policia arriti të identifikojë dhe të arrestojë autorët e dyshuar.

Ndërkaq, ditën e djeshme, autorët për të hyrë në ambientet e brendshme të këtij biznesi kanë përdorur të njëjtën skemë si ajo që u përdor tek banka në Bllok: kanë çarë 4 herë murin në pjesë të ndryshme. Nga këqyrja e vendit të ngjarjes rezulton se vjedhja është kryer duke përfituar nga godina në krahë e argjendarisë, e cila është në ndërtim e sipër. Fillimisht, autorët kanë hapur një vrimë pikërisht nga kjo godinë, e më pas kanë mundur të hynë në brendësi të biznesit.

NGJARJA
Burime pranë policisë bënë me dije se nga hetimet paraprake rezulton se autorë të kësaj ngjarjeje mund të jenë të paktën 4 persona. Fillimisht, autorët kanë hyrë nga godina, e cila është në ristrukturim e sipër, punimet e së cilës ishin ndërprerë për mungesë lejeje. Muri është çarë me mjete të forta, si vare dhe pas kësaj, autorët kanë mundur të hynë në ambientet e kuzhinës së lokalit të pronarëve të argjendarisë. Më pas, ata kanë çarë edhe murin që lidh kuzhinën me ambientin kryesor të argjendarisë dhe një tjetër të çarë në pjesën ku lidhet lokali me dhomën tjetër ku ruheshin bizhuteritë. Gjithashtu, autorët kanë çarë edhe tavanin e dyqanit dhe kanë arritur të shkëpusin çdo lidhje të kamerave të sigurisë dhe të sinjalit të alarmit. Autorët, pasi kanë marrë sasi të mëdha bizhuterish, që sipas pronarit të lokalit kapin vlerën e miliona eurove, kanë marrë me vete edhe serverin ku ruheshin pamjet filmike. Për policinë, kjo gjë e bën edhe më të vështirë identifikimin dhe vënien në pranga të autorëve. Ndërkaq, për identifikimin e tyre, policia ka sekuestruar disa pamje filmike të bizneseve përgjatë kësaj rruge, por si pasojë e errësirës nuk kanë mundur të identifikojnë ndonjërin prej tyre.

DËSHMIA
Sipas dëshmisë së dhënë për mediat, pronari i argjendarisë, Pavllo Shkarpa thotë se nëse ngjarja nuk zbardhet nga policia i mbetet të shpallë falimentin. Gjatë fjalës së tij, ai thotë se autorët kanë marrë rreth 8 kg flori, rreth 25-30 kg argjend dhe rreth 250 ora të markave e të çmimeve të ndryshme. Po sipas tij, vlera e tyre arrin në 500 mijë euro. “Jam Pavllo Shkarpa, me profesion jam inxhinier. Jam kryetar i shoqatës ‘Berat’. Ushtroj dhe biznesin e argjendarisë, kam 25 vite që merrem me këtë biznes. Sot ka ndodhur një vjedhje spektakolare në dyqanin tim. Vjedhje e organizuar sipas mendimit tim, por edhe të ekspertëve të komisariatit nr.1. Policia ka qenë këtu që në momentin që unë bëra denoncimin dhe kanë qenë të gatshëm. Shpresoj që të zbardhet kjo ngjarje dhe të gjenden autorët. Do më vijë mirë që të gjendet, sepse unë dua të rri në këtë vend. Kjo është vjedhja e dytë që bëhet brenda 3 muajsh. Vjedhja e parë u mbyll nga prokuroria pa autor. Jam i siguruar, dhe gjithë mallin tim e kam të kontabilizuar, e njeh shteti shqiptar. Jam person korrekt, i ndershëm. Jam kryetar i shoqatës së argjendarëve të Shqipërisë, edhe pse kjo shoqatë nuk funksionon. Argjendarët janë të rrezikuar, janë nën rrezikun e armëve. Miqtë tanë dhe kolegët tanë i kanë vrarë, ndërsa mua më kanë vrarë duke me grabitur të gjithë investimin 25-vjeçar. Dëmi mund të vejë rreth 500 mijë euro. E gjithë vlera që unë kam pasur. Më kanë marrë të gjithë sasinë e floririt që kam pasur, gati 8 kg, kanë marrë një sasi argjendi, ka qenë edhe ajo gati 30 kg. Kanë marrë një sasi orësh që janë firmato, të shtrenjta”, tha Shkarpa. Për këtë ngjarje, ai bën fajtor ndërtimin krah biznesit të tij, që është pezulluar si dhe firmën e sigurisë që nuk e ka njoftuar në momentin që ka diktuar që dikush ka hyrë në dyqan. “Godina është në pronësi të përbashkët me një person që po bën restaurim, është monument kulture. Vërej se kjo vilë ka marrë leje për punimet, por është penguar nga policia sepse nuk ka marrë leje të plotë. Personat kanë punuar, madje edhe kanë dëmtuar. Në bazë të rregullave, pasi unë jam inxhinier, ata kanë bërë dëmtime edhe në murin që është bashkëpronësi. E kanë çuar nga 20 cm, që ishte në 10. Ka qenë një objekt që ka mbledhur shumë kriminelë këtë kohë, njerëz që hynin dilnin. Nga ana e pronarit nuk është marrë asnjë lloj mase për mbrojtjen e saj”, thotë më tej pronari i argjendarisë. /GSH/