Grabitja e BKT në Vlorë, arrestohet një person i dyshuar

Një person i dyshuar për vjedhjen me dhunë të Bankës Kombëtare Tregtare në Vlorë është arrestuar.

Lorenc Gjini, 26 vjeç, banues në Vlorë, u u vu në pranga ditën e djeshme. Nga hetimet e kryera nga Seksioni Kundër Krimeve ndaj Pronës, lidhur me vjedhjen e BKT në mes të ditës në 11 korrik, është bërë identifikimi i 26- vjeçarit dhe arrestimi i tij, pasi dyshohet të jetë një nga bashkëpunëtorët e dyshuar të vjedhjes.

Policia ka bërë ndalimin e Lorenc Gjinit për veprën penale “Vjedhja e bankave dhe arkave të kursimit, kryer me dhunë”.

Më herët në lidhje me këtë ngjarje është arrestuar Kostandinos Shakaj, ndërsa është shpallur në kërkim i dyshuari tjetër Gaqo Gjini.

Ngjarja ndodhi në 11 korrik rreth orës 14:00, në lagjen “Hajro Çakërri” të qytetit të Vlorës.

Nga kryerja e veprimeve të para hetimore ka rezultuar se një person i maskuar dhe i pajisur me pistoletë ka hyrë në ambientet e brendshme të degës së bankës, ku ka vjedhur një sasi të konsiderueshme parash në monedhat lekë dhe euro.

Gjatë kohës që personi i maskuar ka hyrë në ambientet e brendshme të bankës, një tjetër person i maskuar dhe i dyshuar si i armatosur me automatik, ka qëndruar jashtë bankës tek dera hyrëse e saj, ku ka kanosur dhe penguar rojet që të kryenin detyrën.

Sipas inventarit të mbajtur nga ana e auditit të bankës, dyshohet se autorët kanë mundur të marrin një sasi prej 6 milionë lekë të reja dhe 33.695 euro.