Grabitje seriale/ Tre karburante sulmohen brenda një jave. Asnjë i arrestuar

Brenda një jave nga (10-17 tetor) janë grabitur tre karburante në Tiranë. E fundit ndodhi mbrëmë pas mesnate, në rrugën “Isuf Elezi” në kryeqytet. Ka qenë një person i maskuar me kapuç në kokë, i moshës 25 vjeç, që me anë të kërcënimit, i ka marrë 8 000 lekë (të reja) dhe një celular “iPhone 6”, punonjësit të karburantit me iniciale H. S., 42 vjeç.

Ndërkohë, më 11 Tetor, në rrugën nacionale Tiranë – Fushë  Krujë është grabitur një pike karburanti nga persona ende të paindentifikuar. Dy persona të maskuar dhe nën kërcënimin e armës i kanë marrë rojes së karburantit, shtetasit A.B. rreth 42 vjeç, 10 000 lekë (të reja) dhe më pas janë larguar.

Ndërsa të dielën e 10 tetorit ka ndodhur një grabitje me armë në një pikë karburanti tek Unazë të Re në Tiranë. Një person i paidentifikuar, rreth 16 – vjeç, nën kërcënimin e armës i ka marrë xhiron ditore punonjësit të karburantit. Më pas ai është larguar sëbashku me një person tjetër të paidentifikuar me motor, në drejtim të sheshit “Shqiponja”.

Tre rastet e sipërpërmendura janë ende të pazbuluara nga policia. Nuk ka asnjë person të arrestuar për grabitjet seriale të karburanteve në kryeqytet. /Opinion.al