Greqia paralajmëron Shqipërinë dhe i kujton dobësitë: Zgjidhim çështjet, pastaj negocioni për BE

Ministri i Jashtëm i Greqisë, Nikos Kotzias në një intervistë për mediat greke ka folur edhe për çështjen çame, një problem i ndezur së fundmi pas deklaratës së komisionerit të BE Johannes Hahn.

Kotzias ka kërkuar nga Qeveria Shqiptare që të tregohet më e kujdesshme në lidhje me deklaratat që bën për këtë çështje të ndjeshme, duke i kujtuar se Greqia është shtet shumë herë më i fortë.

“Greqia ia kalon në të gjitha fushata, ka 10-fishin e PBB, sisteme të forta të mbrojtjes dhe të sigurisë. Shqipëria ka varësi të fortë ekonomike nga emigrantët, investimet, tregtia. Kemi edhe përfaqësim asimetrin në arenën ndërkombëtare”, është shprehur Kotzias.

Ministri i Jashtëm i Greqisë ka paralajmëruar Shqipërinë gjithashtu që problemet e hapura mes dy vendeve të zgjidhen përpara se vendi ynë të hapë negociatat për anëtarësimin në Bashkimin Europian.

“Të zgjidhim problemet me vendet që aspirojnë të hyjnë në Europë, përpara se të fillojnë negociatat me BE-në, kjo është në interes të tyre”, është shprehur ministri Koztias.

Kreu i diplomacisë greke foli edhe për deklaratën e eurokomisionerit Hahn, të cilin e akuzoi se ka publikuar pa autorizimin dokumentet e negociatave mes Shqipërisë dhe Greqisë, mes të cilave edhe për çështjen çame për të cilën tha se një gjë e tillë nuk ekziston për Greqinë.