Helmimi i nxënësve, reagon policia: Drejtoresha dyshon për hashash, por ne nuk e gjetëm

Policia e Tiranës ka mohuar përdorimin e hashashit në shkollën 9-vjeçare “Jashar Hoxha” në Paskuqan. Përmes një njoftimi zyrtar, policia thotë se është njoftuar nga drejtoresha e shkollës, e cila ka pretenduar përdorimin e hashashit nga nxënësit por nga kontrolli nuk u gjet lëndë narkotike.

Njoftimi i plotë i policisë

Më datë 06.10.2016, në numrin e emergjencave 112, ka ardhur një telefonatë nga Drejtoresha e shkollës 9 vjeçare “Jashar Hoxha”, në Kamëz, se 4 fëmijë në shkollë kanë pasur probleme shëndëtësore.

Menjëherë në shkollë është dërguar grupi hetimor, ku Drejtoresha e kësaj shkolle ka pretenduar se mos ka patur lëndë narkotike një nga nxënësit.

Shërbimet e Komisariatit të Policisë Nr 5, kanë kontrolluar të gjithë shkollën, nga ku ka rezultuar se në shkollë nuk është konstatuar asnjë lëndë e dyshuar narkotike. Nga kontrolli i imsishëm dhe aroma e ndierë nga shërbimet dyshohet se aroma ka qënë kimikat (në formë të gaztë) që përdoret për pastrim.

Nxënësit të cilët kanë shfaqur probleme me shëndetin, kanë marrë mjekimin e nevojshëm në Spital. Sipas deklaratave të tyre aroma ka qënë shumë e fortë.

Nga deklarimi i mjekut të Spitalit, figuron se këto shqetësime nuk kanë ardhur si pasojë e aromës së ndonjë lëndë narkotike por nga aroma e ndonjë kimikati të fortë.

Shërbimet e policisë po punojnë për evidentimin e llojtë të kimikatit të futur në shkollë.