‘Heroi i Punës Socialiste’: Më gjeni një punë për djalin në Zyrat e Punës

Qerim Asllani është një pensionist me banim në Durrës, i cili pas 45 vjetësh punë, të ardhur të vetme në familje ka pensionin e tij prej 126 mijë lekësh të vjetra në muaj.

65-vjeçari ka bindur djalin e tij 24 vjeç, prej tre vjetësh i papunë, të kërkojë një punë në Zyrën Rajonale të Punësimit në Durrës.

Në një intervistë për DurrësLajm, 65 vjeçari tregon se vetëm me pensionin e tij mban familjen. Djali ka tre vjet pa punë, bashkëshortja nuk ka përfituar pension, sepse ka patur 20 vjet punë dhe ka qënë nënë me shumë fëmijë.

“Me 126 mijë lekë të vjetra mbaj familjen. 40 mijë në muaj më kushtojnë ilaçet” thotë i moshuari.

Asllani ka lindur në Dibër, ka punuar në metalurgjikun e Elbasanit, aty edhe ku u aksidentua rëndë dhe u shpall “Hero i Punës Socialiste”. Prindi i 6 fëmijëve lutet që Zyra e Punës në Durrës t’i gjejë një punë djalit të tij 24 vjeçar, pasi e ka të pamundur të përballojë jetesën në këto kushte.