Horror në Golem, e përplasin qëllimisht me motor dhe e dhunojnë

Një person ndodhet në gjendje të rëndë në spital, por jashtë rrezikut për jetën. Bëhet fjalë për shtetasin 54 vjeçar Y.K, banues në Golem. Ai është goditur qëllimisht me motor në këmbë e më pas dhunuar me grushte e shkelma në kokë e kudo në trup.

Sipas burimeve zyrtare, ngjarja ka ndodhur pas një konflikti për motive të dobëta mes autorit Arben Çepeli, 48 vjeç, banues në Kavajë, dhe viktimës Y. K., 54 vjeç, banues në Golem.

“Në fshatin Kanaparaj Golem, për motive të dobëta, ka goditur qëllimisht në këmbë me motorin e tij tip “Dajang” dhe më pas me grushte e shkelma në kokë, fytyrë e trup, shtetasin Y. K.”, bën me dije policia e Tiranës.

Pas ngjarjes, 54-vjeçari u dërgua në urgjencën e Spitalit Rajonal Durrës, nga ku raportohet se ndodhet jashtë rrezikut për jetën.