Ilir Meta po nis para kohe Fushatën e Zgjedhjeve të 2017-s

Nga Artur Zheji

Duket gjithmonë e më qartë se Koalicioni është në ethe të pazakonta. Ethe elektorale, në Vjeshtën që po ikën dhe në Dimrin që po vjen.

Fushata zgjedhore për kryetarin e LSI, po shndërrohet në një fushatë zgjedhore me jehonë kombëtare, ku Meta po “sulmohet” nga kandidatët për kryetarë, për koalicionin e tij me PS dhe faturën e kripur zgjedhore që kjo bashkëqeverisje PS-LSI, po ja le në derë kryesisht LSI-së.

Nga ana tjetër por formëzohen disa kontradikta të forta, ndërmjet Ramës dhe Metës, të cilat nuk kanë dalë në publik nga pakujdesia, por dukshëm në mënyrë të qëllimshme. Kontradikta e parë lidhet me Ligjin e Plehrave, që me 21 shtator, Meta e braktisi personalisht, duke munguar qëllimisht në seancën parlamentare, por tani, duket gjithmonë e më shumë se do ta braktisë politikisht dhe plotësisht këtë Ligj të kontestuar nga shoqëria civile dhe opinioni publik shqiptar.

Duke e lënë Ramën të vetëm, përpara tërbimit dhe refuzimit popullor, të këtij Ligji Plehrash, me pasoja të rrezikshme për të ardhmen e shqiptarëve. Rama nga ana e vet, është këto ditë në udhëkryqin e vështirë, për ta vazhduar ose jo, këtë betejë të humbur kombëtare, që po shkon në favor të Ilir Metës, ku mjaft analistë dhe ambientalistë, kanë kthyer sytë, te numrat që ai kontrollon në Kuvend, numra që e rrëzojnë plotësisht këtë Ligj Plehrash, nëse rikthehet në Parlament.

Dhe kjo është një goditje e rëndë për Ramën, që investoi energji, lumenj fjalësh dhe pseudoarësyesh, me kryetemë formulën retorike se Ligji i Plehrave, do të pastrojë Shqipërinë nga Plehrat.

Tema e dytë e përplasjes së dukshme Rama-Meta, lidhet me ligjin elektoral në përgjithësi dhe debatin për Listat e Hapura dhe Listat e Mbyllura, në veçanti. Këtu përplasja sapo ka filluar dhe parashikohet të shndërrohet në një vijë ndarëse dhe madje konfliktuale ndërmjet PS dhe LSI. Por kjo “tradhton” gjithashtu edhe synimin e Metës, për të eksperimentuar, një rrugëdalje tjetër politike në Zgjedhjet e ardhshme të vitit 2017.

Madje kjo tingëlloi edhe disi bombastike, kur ai, Meta, nga Kina e largët, replikoi me Ramën, pikërisht për çështjen e Koalicionit të ardhshëm elektoral, të Zgjedhjeve 2017. Disa pak minuta pas deklaratës përkëdhelëse dhe bombastike të kryeministrit, në një studio televizive se: “Koalicioni PS-LSI është më i qëndrueshmi në Europë dhe se në vitin e ardhshëm, PS dhe LSI do të garonin së bashku”, Meta i kujtoi Ramës, se ky nuk ishte një vendim që strukturat e Lsi e kishin marrë. Dhe se ishin strukturat dhe jo Meta, që do ta merrnin në një kohë të dytë, një vendim të tillë.

Ligji aktual elektoral, që dhe mirëfunksionoi në vitin 2013, në favor të PS, por edhe në favor të ndjeshëm për LSI, është një ligj që u përshtatet koalicioneve dhe në këtë rast, edhe LSI, nëse ajo do të garojë në koalicion me PS. Kontestimi ndaj këtij ligji elektoral dhe ndryshimi në favor të një dimensioni më proporcional, u përshtatet partive që garojnë të vetmuara, nga të ashtuquajturat 2 partitë e mëdha, e pra qëndrimi politik i Metës, në favor të reformimit të këtij Ligji Zgjedhor, bën edhe më të dukshëm, tendencën e LSI që ai drejton, drejtë një konkurrence elektorale, të ndryshme nga ajo e vitit 2013.

Nënshkruar në Marrëveshjen e 1 Prillit 2013. Duket pra qartë, se Ilir Meta, po fillon në mënyrë të parakohshme Fushatën Zgjedhore, të vitit 2017, mjaft para kohe dhe në kundërshtim me parashikimet e deritashme rozë, që kryeministri, ka lëshuar si lulka zbukurimi, nëpër studio televizive.

/360grade.al