Ilir Meta viziton sot Greqinë

Kryetari i Kuvendit, Ilir Meta nis sot, një vizitë zyrtare në Greqi me ftesë të kryetarit të Parlamentit Grek, Nikos Voutsis. Meta do të shoqërohet në këtë vizitë treditore nga një delegacion i rëndësishëm përfaqësues i Kuvendit të Shqipërisë. Përveç bisedimeve dypalëshe me kryetarin e Parlamentit të Greqisë, por dhe me kryetarë të grupeve parlamentare, Ilir Meta do të pritet në një audiencë të veçantë nga Presidenti i Greqisë, Prokopis Pavlopoulos, si dhe do të takohet me Kryeministrin e Greqisë, Alexis Tsipras dhe ministrin e Punëve të Jashtme të Greqisë, Nikos Kotzias. Qëllimi i vizitës është të forcojë marrëdhëniet dhe bashkëpunimin mes dy parlamenteve dhe mes dy vendeve fqinje anëtare të NATO-s dhe pjesëmarrëse në proceset evropiane integruese të rajonit.

Gjithashtu, gjatë kësaj vizite kryetari i Kuvendit, Ilir Meta, do të takohet edhe me një grup përfaqësuesish të komunitetit shqiptar që jetojnë në Greqi. Vizita e Metës vjen në një kohë kur çështja çame është kthyer në një ‘mollë’ sherri mes dy vendeve, por edhe në politikën e brendshme greke. Para nisjes nga Tirana, z. Meta u shpreh: “Marrëdhëniet mes Shqipërisë dhe Greqisë janë marrëdhënie që shkojnë përtej kontakteve politike që gëzojmë mes dy vendeve tona. Miqësia jonë bazohet në shekuj mirëkuptimi dhe shkëmbimesh mes dy popujve tanë që kanë kaq shumë të përbashkëta.

Besoj se vizita jonë në Athinë do t’i shërbejë intensifikimit konkret të bashkëpunimit ndërparlamentar i cili është i rëndësishëm për të gjithë bashkëpunimin tonë politik dhe ekonomik, dhe që ne dëshirojmë t’a avancojmë me vullnet të plotë në çdo nivel në të ardhmen”. Gjatë kësaj vizite 3 ditore zyrtare në vendin fqinj, Kryetari i Kuvendit Meta shoqërohet prej Kryetares së Komisionit për Politikën e Jashtme znj. Arta Dade, Kryetarit të Komisionit për Veprimtaritë Prodhuese, Tregtinë dhe Mjedisin z. Eduard Shalsi, dhe deputetët z. Anastas Angjeli (PS), z. Fatmir Toçi (PS), z. Gjergji Papa (PD), z. Vangjel Tavo (LDI) dhe z. Vangjel Dule, Kryetar i Partisë Bashkimi për të Drejtat e Njeriut (PBDNJ).

Pak ditë më parë. ishte ambasadorja e Greqisë në Tiranë, e cila tha se nuk kishte asnjë çështje të mbetur pezull mes shteteve. Më pas ishte përgjigjja që dha eurokomisioneri Johannes Hahn, i cili deklaroi se BE-ja mirëpret diskutimin e çështjes çame dhe paktit detar mes Shqipërisë dhe Greqisë. Kjo duket acaroi qëndrimet e Ministrisë së Jashtme greke, e cila nga ana e saj i cilësoi të njëanshme qëndrimet e Hahn.

Në një postim, dje në rrjetin social, shoqëruar edhe me një foto të tij, deputeti i PS-së, Fatmir Toçi, si pjesë e delegacionit të Kuvendit, u shpreh: “Nga nesër, një delegacion i Kuvendit të Shqipërisë, pjesë e të cilit kam kënaqësinë dhe nderin të jem, i kryesuar nga kryetari i Kuvendit, Ilir Meta, do të jetë në një vizitë zyrtare në parlamentin grek. Në programin e vizitës janë parashikuar takime të nivelit më të lartë politik e shtetëror të Greqisë, me kryetarin e Kuvendit, Presidentin e Republikës, kryeministrin, ministrin e Jashtëm, kryetarët e partive, mbështetjen reciproke, por edhe diskutimi i problemeve konkrete të vjetra e aktuale, zgjidhja e të cilave do t’i çojë më përpara dhe forcojë më tej marrëdhëniet aktualisht të mira”, shkroi Toçi./BW