IMSI Catcher, ngrihet komisioni hetimor për pajisjen e përgjimit

Pasditen e sotme, është ngritur komisioni hetimor që do të shqyrtojë nëse është zbatuar ligji për të kontrolluar zbatimin e legjislacionit në fuqi për përdorimin dhe administrimin nga ana e Ministrisë së Brendshme për pajisjen përgjuese “IMSI Catcher”.

Në mbledhjen e parë të tij, komisioni ka miratuar kalendarin e punimeve ndërsa në ditët në vijim do të vijojë shqyrtimi.

Gjatë seancës së të enjtes së 6 tetorit, Kuvendi miratoi ngritjen e këtij komisioni hetimor.

Kërkesa është depozituar nga një grup deputetësh i Partisë Demokratike, të cilët kërkojnë të zbulojnë nëse pajisja është përdorur për realizimin e përgjimeve të paligjshme.

Objekti i punës së komisionit hetimor është:

1) Kontrollin e zbatimit të legjislacionit në fuqi për hyrjen, administrimin dhe përdorimin e pajisjes përgjuese “IMSI Catcher”;

2) Njohja dhe verifikimi i mënyrës së përdorimit të saj dhe lëvizjes së kryer nga kjo pajisje dhe mjetit ku ajo ndodhej;

3) Njohja me dokumentacionin e plotë ligjor për përdorimin e saj, dhe veprimtarinë e kryer me pajisjen “IMSI Catcher”, për të konkluduar në realizimin apo jo të përgjimeve të paligjshme nëpërmjet saj;

4) Kontrolli i sjelljes dhe veprimeve konkrete të autoriteteve të përfshira në këtë ngjarje, në raport me nevojën e zbardhjes së këtij skandali.

Prokuroria ka nisur një hetim për pajisjen, ndërsa janë marrë në pyetje zyrtarët e lartë të policisë së shtetit.

Prokuroria ka nisur një hetim për pajisjen, ndërsa janë marrë në pyetje zyrtarët e lartë të policisë së shtetit. Për veprimtarinë e pajisjes, janë pyetur edhe krerët e disa institucioneve nga Komisioni Parlamentar i Sigurisë Kombëtare, siç është kreu i SHISH, Visho Ajazi Lika, kryeprokurori Adriatik Llalla dhe ministri i Brendshëm, Saimir Tahiri.