ISIS-i mund të sulmojë me armë kimike, qindra civilë largohen nga Mosuli

Shtetet e Bashkuara presin që shteti islamik të përdorë armë kimike të papërpunuara  për të zmbrapsur një sulm në Irak për tu rimarrë qytetin e Mosulit.

Zyrtarët amerikanë kanë shprehur ‘frikën’ për një ngjarje të tillë  edhe pse duke shtuar se aftësia teknike e grupit për të zhvilluar armë të tilla është shumë e kufizuar.

Nga ana tjetër mbi 900 persona, janë larguar nga qyteti irakian Mosul dhe kanë kaluar kufirin për në Siri, ka thënë agjencia për refugjatë e Kombeve të Bashkuara.

Ky është grupi i parë i madh i civilëve, i konfimuar, që ka ikur nga Mosuli, që prejse qeveria irakiane të hënën nisi ofenzivën për çlirimin e qytetit nga grupi militant, Shteti Islamik, njofton BBC.

Besohet se në Mosul jetojnë 1.5 milion banorë dhe mbi 5 mijë luftëtarë. Ka frikë se militantët do të përdorin civilët si mburojë njerëzore, teksa forcat irakiane i afrohen Mosulit.

Ky numër i madh i njerëzve që kanë ikur nga Mosuli tregon se militantët nuk janë në gjendje të ndalin të gjithë njerëzit që duan të ikin. Po ashtu ka frikë se edhe luftëtarët e IS-it mund të përdorin të njëjtën rrugë për të ikur nga Mosuli.

Të hënën, forcat e qeverisë irakiane dhe forcat kurde, të mbështetura nga koalicioni ndërkombëtar që po udhëheqet nga SHBA-të, kanë nisur ofensivën për çlirimin e Mosulit. Ky qytet ka rënë nën kontrollin e IS-it në vitin 2014.