Kërkohej prej 3 vitesh, i dënuari kapet pranë shtëpisë së tij. Ja emri

Një person i cili ishte dënuar me 10 vite burg është vënë në pranga mëngjesin e sotëm.  Klodian Pashako, 37 vjeç, banues në Delvinë është arrestuar nga Forcat e Ndërhyrjes së Shpejtë mëngjesin e sotëm në afërsi të banesës së tij.

Ky person ishte në kërkim për ngjarjen e ndodhur më datë 25 gushtit 2013, në Delvinë, ku pas një konflikti për motive të dobëta, Pashako ka tentuar të vrasë me armë zjarri 51-vjeçarin me inicialet Z. Zh., banues në fshatin Drizar, Mallakastër, duke e lënë këtë të fundit të plagosur.

Policia e Sarandës në bashkëpunim me Forcat e Ndërhyrjes së Shpejtë, kanë realizuar  operacionin e kapjes së këtij personi në orët e para të mëngjesit të sotëm, pranë banesës së tij në fshatin Vllahat të Delvinës.

I kërkuari tentoi të largohej me shpejtësi nga banesa e tij, por u neutralizua në mënyrë të menjëhershme nga forcat pjesëmarrëse në operacion.

Klodian Pashako është dënuar me 10 vite burg për veprat penale “Vrasje e mbetur në tentativë”, Plagosje me dashje” dhe “Armëmbajtje pa leje”.