Kryeministri Gjukanoviç fiton zgjedhjet, vetëm një deputet shqiptar në parlamentin e ri malazes

MAL I ZI- Mali i Zi ka përmbyllur votimet në zgjedhjet parlamentare, që janë parë si jetike për vendin në vendimin e tij për të vazhduar rrugën perëndimore apo për t’iu kthyer aleatit Rusisë. Në zgjedhje kanë marrë pjesë mbi 73 për qind e votuesve nga mbi 530 mijë votues të regjistruar. Në bazë të rezultateve paraprake të Qendrës për Vëzhgim dhe Hulumtim (CeMI), nga të dhënat e kopjeve të materialit zgjedhor, Partia Demokratike e Socialistëve, e kryeministrit Gjukanoviç ka fituar shumicën e votave duke dalë partia e parë në zgjedhje me mbi 40 për qind (36 vende në Parlament), ndërkohë që partia në opozitë Fronti Demokratik ka marrë mbi 20 për qind të votave (18 vende në Parlament).

Sipas rezultateve të deritashme Lista “Shqiptarët të vendosur”, e koalicionit tre partiak, ka arritur që të sigurojë një vend në Parlament. Në bazë të vlerësimeve të Qendrës për Tranzicion Demokratik, asnjëra parti politike nuk ka arritur që të fitojë shumicën absolute për të krijuar e vetme qeverinë. Ka patur një numër ankesash për incidente gjithandej vendit, përcjell Rel. Ndërkohë, vëzhguesit ndërkombëtarë pritet që të dalin me raportin e paraprak për zgjedhjet parlamentare në Mal të Zi, ditën e hënë.

KRYEMINISTRI GJUKANOVIÇ: NE DO TË FORMOJMË QEVERINË
Sipas të dhënave, Partia Demokratike Socialiste e kryeministrit Millo Gjukanoviç ka fituar 35 mandate, ndërsa dy blloqet kryesore opozitare Fronti Demokratik dhe Kljuc kanë fituar 18, respektivisht 9 mandate. Lista e partive shqiptare, ndërkaq, ka fituar vetëm një mandat. Sipas përfaqësuesve politikë shqiptarë, ky është rezultati më i keq në historinë e pluralizmit. Rezultatet zyrtare nga ana e autoritetit shtetëror zgjedhor priten në ditët në vijim. Gjukanoviç, i cili ka udhëhequr Malin e Zi herë si president, herë si kryeministër për më shumë se 25 vjet, duhet të përpiqet të krijojë shumicën në një parlament thellësisht të ndarë. Duke iu adresuar mbështetësve, Gjukanoviç tha se do të kërkojë koalicion me partitë e pakicave kombëtare: boshnjakët, kroatët dhe shqiptarët.

“Menjëherë pas shpalljes së rezultatit zyrtar, do të nisim negociatat. Ne do të formojmë qeverinë”, tha Gjukanoviç. Partia e tij është përballur me grupet opozitare pro-ruse dhe pro-serbe, që kundërshtojnë fuiqshëm anëtarësimin e Malit të Zi në NATO dhe integrimin e tij në Bashkimin Evropian. “Mali i Zi do të vazhdojë drejt së ardhmes evropiane. Do të ratifikojmë anëtarësinë në NATO dhe do të përfundojmë bisedimet për anëtarësim në BE. Do të sjellim investime të reja, do të përmirësojmë standardin e jetës”, u tha Gjukanoviç mbështetësve në Podgoricë.

Një natë para zgjedhjeve, autoritetet malazeze arrestuan 20 paramilitarë serbë, të dyshuar për planifikim të sulmeve. Prokurorët kanë thënë se grupi mund të ketë planifikuar rrëmbimin e Gjukanoviçit. Ish-komandanti i forcave speciale të Serbisë, Bratisllav Dikiç, i cili është larguar nga posti më 2013 për shkak të aktiviteteve të dyshuara kriminale, raportohet se është në mesin e të arrestuarve. Udhëheqësi i partisë opozitare malazeze Fronti Demokratik, Andrija Mandiç, tha se lajmi është “propagandë bruto”. Mali i Zi është thellësisht i ndarë midis atyre që favorizojnë dhe kundërshtojnë integrimin me Perëndimin. Pas ndarjes nga Serbia më 2006, Mali i Zi, i cili ka qenë aleat i Rusisë, është përqendruar drejt integrimit euro-atlantik. Marrëdhëniet mes Rusisë dhe Malit të Zi janë ftohur në mars të vitit 2014, kur Podgorica u është bashkuar sanksioneve të BE-së kundër Rusisë, për shkak të krizës në Ukrainë. Marrëdhëniet e tyre kanë pësuar goditje tjetër kur Mali i Zi ka nënshkruar marrëveshjen për anëtarësim në NATO, në muajin maj. Opozita malazeze vazhdimisht akuzon Gjukanoviçin për korrupsion, nepotizëm dhe keqmenaxhim ekonomik.