Kryeprokurori Llalla takim urgjent me prokurorin dhe kryepolicin e Shkodrës, më pas niset drejt Malit të Zi

Kryeprokurori Adriatik Llalla ka zhvilluar sot për pak minuta një takim me prokurorin Granit Shahu dhe drejtorin e Policisë së Qarkut Shkodër, Alban Çela. Ndërkohë, nuk dihen ende motivet e këtij takimi, i cili është mbajtur tek ‘Coloseu’ në qytetin verilindor.

Llalla, i shoqëruar nga 3 truproja, ku të pranishëm kanë qenë edhe forca policore, është nisur me automjet drejt Malit të Zi, ku pritet të ketë një tjetër takim. Kjo vizitë e kryeprokurorit në Shkodër vjen dy ditë pas vrasjes së ndodhur në Dajç, ku një perosn i armatosur hapi zjarr në një lokal, ku për pasojë u vranë 2 persona dhe u plagosën 4 të tjerë.

Pak ditë më parë, mediat zbuluan se kryeprokurori Llalla është detyruar të largojë fëmijët dhe bashkëshorten shtatzënë nga Shqipëria në një vend aleat, pasi dy muaj më parë në telefonin e tij kanë mbërritur telefonata dhe mesazhe kërcënuese anonime. Kryeprokurori ka njoftuar autoritetet qeveritare, Presidentin e Republikës, Shërbimin Informativ dhe më pas janë shtuar masat e sigurisë, qoftë në prokurori, shtëpinë private si dhe eskortat për familjarët, dy fëmijët e tij të cilët janë në shkollë dhe bashkëshorten. Natyra e kërcënimit nuk dihet, por flitet se i ka ardhur për shkak të një dosjeje hetimore ndaj një grupi të supozuar kriminal.