Kthimi për rishqyrtim i Ligjit për Mbetjet, reagojnë ‘Ricikluesit’

Shoqata e Ricikluesve të Shqipërisë ka reaguar pas kthimit për rishqyrtim në Kuvend, që Presidenti Bujar Nishani i bëri ligjit që lejon importin e një grupi të caktuar mbetjesh në vend.

Shoqata e Ricikluesve të Shqipërisë ka reaguar pas kthimit për rishqyrtim në Kuvend, që Presidenti Bujar Nishani i bëri ligjit që lejon importin e një grupi të caktuar mbetjesh në vend.

“Jemi të zhgënjyer që një çështje me implikim qartësisht vetëm ekonomik, social dhe mjedisor bëhet objekt i betejave politike të radhës?, është qëndrimi i ‘Ricikluesve’.

“Shoqata e Ricikluesve të Shqipërise, shpreh keqardhjen e vet të thellë, për mosdekretimin nga ana e Presidentit të Rëpublikës, te Ligjit nr.92/2016 për lejimin e importimit të lëndëve të para për industrinë e riciklimit. Shoqata e Ricikluesve bën me dije se, në ditët në vazhdim do të vijojë të japë të gjitha argumentet e saj për domosdoshmërinë e miratimit të këtij ligji”, thuhet në reagimin e Shoqatës.

Pak më parë, kreu i shtetit pati një takim me përfaqësues të kësaj shoqate, por duket se argumentet e ofruara prej tyre nuk e kanë bindur Presidentin për të miratuar ligjin.

Shoqëria civile ka protestuar për kthimin e këtij ligji, që sipas tyre dëmton rëndë shëndetin. Ata argumentojnë se ligji synon të sjellë plehrat në Shqipëri me qëllim riciklimin në vendin tonë, në kushtet kur mungon edhe infrastruktura për ta bërë këtë proces. Ligji është kundërshtuar edhe nga kreu i PD-së, Lulzim Basha.

Miratimi i ‘ligjit të mbetjeve’ në Kuvend është bërë disa javë më parë vetëm me votat e mazhorancës.