Kultivonin kanabis në periferi të Tiranës, katër në pranga, në kërkim dy financuesit

Një tjetër grup kriminal i kultivimit të kanabisit është goditur nga policia e Tiranës. Në kuadër të operacionit të koduar “Fagu”, u arrestuan katër persona, ndërsa dy të tjerë u shpallën në kërkim.

Plot 27 kg drogë e sekuestruar dhe armatime, është bilanci i një operacioni të finalizuar sot nga policia e Tiranës.

Uniformat blu sqarojnë se të arrestuarit janë katër punëtorë, të cilët janë financuar për kultivim të drogës nga dy personat të cilët janë shpallur në kërkim.

Të arrestuarit janë: D.M, 16 vjeç, Pasha Muca, 25 vjeç, Elsion Almeta, 19 vjeç, dhe Ervis Muça, 21 vjeç; të katërt banues në Tiranë.

Policia informon se: Nga deklarimet e shtetasve të lartpërmendur, ka rezultuar se këta persona janë financuar për kultivimin e bimëve narkotike nga shtetasit e shpallur në kërkim: F.A, 21 vjeç; dhe A.A, 47 vjeç, dhe këta banues në Tiranë

Arrestimi i këtyre shtetasve dhe shpallja në kërkim i dy të tjerëve u bë në bazë të informacioneve të marra nga Specialistët e Komisariatit të Policisë Nr 4, se në zonën e fshatit Fag, në pyllin e Panecit, ku janë gjetur të kultivuara 600 bimë në një parcelë si dhe 6280 degë të dyshuara narkotike të llojt Cannabis Sattiva, në proçes tharje të cilat u asgjesuan me anë të djegies.

Gjithashtu janë gjetur rreth 27 kg lëndë e dyshuar narkotike e llojt Cannabis Sattiva. Po gjatë kontrollit janë gjetur dhe sekuestruar në cilësinë e provës materiale, dy armë zjarri, pushkë model 56, me kasë druri.

Materialet proceduriale i’u kaluan Prokurorisë pranë Gjykatës së shkallës së parë Tiranë, për veprat penale “Kultivim i bimëve narkotike”, “Shitje dhe shpërndarje narkotikësh”, “Prodhim dhe mbajtje pa leje të municioneve dhe armëve luftarake” dhe “Organizim dhe drejtim i organizatave Kriminale” në bashkëpunim, parashikuara nga Nenet 284, 283 ,278-25 dhe 284/a të Kodit Penal.