Kush është biznesmeni që do të rrjepë ‘udhëtarët e veriut dhe Kosovës’

Në dhjetor të vitit të kaluar Bashkia e Divjakës zhvilloi një tender me objekt: “Sistemim dhe asfaltim i rrugës “Mertish-3 Urat”. Fondi limit i tenderit ishte 337. 4 milionë lekë pa TVSH dhe burimi i financimit ishte qeveria shqiptare përmes Fondit të Zhvillimit të Rajoneve. Në tender paraqitën ofertat 3 kompani.

Oferta e parë ishte e kompanisë “Alba Konstruksion sh.p.k”, me 212 milionë 197 mijë lekë ose rreth 2 milionë dollarë. Në vendin e dytë u rendit oferta e kompanisë A.N.K shpk me 279.7 milionë lekë. Por të dy këto kompani u skualifikuan. Tenderin e fitoi Salillari sh.p.k, kompania në pronësi të biznesmenit Pëllumb Salillari, e cila ofroi një çmim prej 317 milionë lekë ose 1 milionë dollarë më shumë se sa oferta më e ulët. Dikur një faturino autobusi, sot Pëllumb Salillari është një nga oligarkët më të mëdhenj në Shqipëri, me biznes kryesor kontratat publike. Tenderi i Bashkisë së Divjakës për rrugën “Mertish-3 Urat” është vetëm njëri nga episodet që tregon fuqinë dhe lidhjet e forta politike.

Kompania Salillari është fituesja më e madhë e tenderave për ndërtimin dhe mirëmbajtjen e rrugëve në Shqipëri, shpesh herë në mënyrë të dyshimtë. Në vitin 2013 kompania realizoi një xhiro rreth 15 milionë dollarë nga kontratat publike, ndërsa një vit më vonë u rendit ndër 50 kompanitë me xhiron më të madhe në vend. Por së fundmi kompania ka filluar të shtrijë interesat edhe në kontratat afatgjatë publike, gjithmonë duke shfrytëzuar lidhjet e saj. Afera e Durrës-Kukës Tre muaj më parë, Salillari formoi së bashku me shoqërinë Kastrati një konsorcim të quajtur Catalyst për të marrë pjesë në tenderin për konçesionin 35 vjeçar të mirëmbajtjes së rrugës Durrës Kukës.

Pas dorëzimit të ofertave, Ministria e Transporteve e skualifikoi ofertën e dy kompanive dhe shpalli fitues një tjetër konsorcium të drejtuar nga shoqëria turke Vendeka Bilgi. Por ky do të ishte fillimi i një skandali të paprecedentë në historinë e shtetit shqiptar. Catalyst e ankimoi vendimin në Komisionin e Prokurimeve Publike. Ndonëse për shumë kjo u konsiderua si një përpjekje pa asnjë shanspër të ndryshuar rezultatin, pasi në një tender të këtyre përmasave kjo nuk kishte ndodhur asnjëherë, e vërteta rrodhi ndryshe. Komisioni e përmbysi rezultatin duke e thelluar më tej skandalin e këtij konçesionit, që ka ngritur dyshime për korrupsion, shkelje të ligjit dhe konflikt të pastër interesi.

Kryetari i Komisionit të Prokurimit Publik, Gentian Keri, njeriu që ndryshoi fituesin, duke ja hequr kompanisë turke dhe akorduar atë bashkimit të kompanive Kastrati-Salillari, ishte Gentian Keri. Ai është djali i Pilo Kerit, ish deputet i maxhorancës së majtë, dhe një nga ndërtuesit më të mëdhenj në zonën e Beratit me kompaninë Pienvis sh.p.k. Por veç kësaj, kjo kompani është nënkontraktori kryesor i shoqërisë Salillari duke faturuar nga ajo miliona euro në vit. Përmes vendimit për përmbysjen e rezultatit, Keri, ja dha fitoren punëdhënësit të babit të tij, pra kompanisë e furnizon me kontrata qindra milionë lekë. Menjëherë pas vendimi, që ndryshoi fituesin e konçesionit me vlerë 350 milionë euro, ai u largua nga posti i kreut të Komisonit të Prokurimit publik. Ky është një rast i paprecedentë i konfliktit të interesit në administratën publike duke thelluar më tej skandalin korruptiv me vlerë qindra milionë euro, që do të paguhet drejtepërdrejtë nga qytetarët. /SYRI.net/