Kuvend, Rama-opozitës: Mos shtoni panikun tek maturantët, do rreshtohen nga më i miri një pas një

TIRANE – Mbi 120 mijë studentë nisën sot vitin e ri akademik 2016-2017. Faktikisht ky vit fillon me mungesën e një pjese të madhe të studentëve që do të ndjekin vitin e parë të studimeve, pasi ende një pjesë e tyre, rreth 40%, nuk janë regjistruar. Sipas udhëzimit të Ministrisë së Arsimit, dita e fundit e regjistrimit në universitete do të jetë data 27 tetor.

Kjo situatë ka shkaktuar debate në seancën e sotme të Kuvendit, ku deputetë të opozitës kanë akuzuan qeverinë se i detyroi maturantët më të mirë të bëjnë zgjedhje nën presion, ose tek privati, ose në degë jo me emër.

Ministrja e Arsimit, Lindita Nikolla shpjegoi me detaje përse u mor vendimi për të ndryshuar sistemin e pranimit në universitete. Sipas ministres, ankthi i maturantëve është shtuar në mënyrë artificiale.

“Eshtë një sistem i ri që i jep përgjigje problematikave të vjetra. Në ditët në vijim në përfundim të procesit do të kemi raportimin se si dhe çfarë janë treguesit e përmirësuar. Formula ishte e duhura. Në ditët në vijim do të jenë universitetet që do flasin. ky sistem nuk është perfekt, por është i përmirësuar dhe pranë meritës.”- deklaroi Nikolla.

Kryeministri Rama siguroi se ky proces do të hedhë poshtë të gjitha akuzat.
“Mos i panikoni në mënyrë krejt artificiale maturantët, mos nxisni ankthe të panevojshme tek prindërit. Kuotat do të jenë deri në fund në dispozicion dhe do të plotësohen.

Mos u nxitoni sepse vetëm pas pak ditësh do ta kuptoni se çfarë ndryshimi thelbësor ka ndodhur dhe çfarë cilësie është garantuar në këtë proces, për shkak të dy raundeve dhe filtrit , duke bërë të mundur diçka që deri dje ishte utopi. Maturantët do rreshtohen nga më i miri një pas një, dakord ka një shtyrje disa ditore për një arsye shumë të thjeshtë objektive. U ;a shumë kohë këtë erë sepse ishte hera e parë që testohej sistemi. Ata që nuk do kenë plotësuar kuotat në fund të procesit do jenë privatët”-deklaroi kryeministri.

Votohet pr/ligji “për organet e qeverisjes së gjyqësorit”
Seanca e Kuvendit ka sot në rend dite vetëm votimin e çështjeve të mbartura nga séanca paraardhëse, ndërsa të parashikuar për diskutim nuk ka asnjë projektligj.

Fillimisht, axhenda parashikon njoftimin e pr/ligjeve të depozituara në Kuvend dhe më pas procedurën e votimit për një sërë pikash, si kalendarin 3 javor të punës për periudhën 17 tetor – 4 nëntor dhe votimin e pr/ligjeve dhe pr/akteve të pavotuara nga seanca e 13 tetorit.

Mes tyre, më i rëndësishëm është p/ligji “Për organet e qeverisjes së gjyqësorit”. Drafti, pjesë e paketës prej 7 ligjesh të reformës në drejtësi, ishte i vetmi që nuk u votua në séancën e 6 tetorit, bashkë me pesë ligjet e tjera, që do ta bëjnë të zbatueshme paketën kushtetuese të miratuar me konsensus ne seancën e 22 korrikut.

I asistuar nga misioni EURALIUS, pr/ligji në fjale konsiderohet një risi në sistemin gjyqësor shqiptar. Ai rregullon organizimin dhe funksionimin e katër institucioneve: Këshillin e Lartë të Gjyqësorit, Këshillin e Lartë të Prokurorisë, Inspektoriatin e Lartë të Drejtësisë, si dhe Këshillin e Lartë të Emërimeve, lidhur me përbërjen, procedurën e votimit, si dhe kompetencat respektive të tyre.

Megjithë rendin zyrtar të punimeve te seancës, kohën më të madhe të debatit në parlament e zënë diskutimet politike, kryesisht ato që lidhen me çështje nga aktualiteti, si kultivimi i kanabisit, çështja çame, pranimet në universitete, etj.