Maqedonia ka qenë dhe do të jetë greke, porosit presidenti Pavlopulos

Kryetari i Greqisë Prokopis Pavlopulos nuk lëshon asnjë rast që të dërgoje porosi deri te Ish-Republika Jugosllave e Maqedonisë se nga Athina varet integrimi i vendit fqinj në Bashkimin Evropian dhe ta akuzoje Shkupin për irredentizëm.

“Maqedonia ka qenë dhe do të jetë greke”, deklaroi presidenti grek Pavlopulos dhe i porositi qeveritarët maqedonas se me thënie irredentiste nuk mund të anëtarësohen në BE, pasi që po i shkelin parimet evropiane, transmeton TetovaSot.

Pavlopulos porosinë e dërgoi nga Vodeni, ku në një ceremoni solemne me rastin e çlirimit të qytetit nga turqit u shpallë si qytetar nderi.

Sipas tij, Maqedonia po i shkel ligjet evropiane, dhe nuk mund të llogarisë në eurointegrim, pasi që, siç tha “nuk i plotëson as parimet institucionale evropiane”.

“Ne qartazi kemi thënë se duam raporte të mira fqinjësore dhe miqësore. Por, kjo gjë shkon përmes respektimit të historisë dhe institucioneve evropiane”, deklaroi Pavlopulos.

Në ceremoninë e njëjtë ai dërgoi porosi edhe deri tek Ankaraja, duke thënë se “Greqia është dera e Turqisë për në Evropë” dhe se për integrimin e Turqisë duhet respektuar historia dhe ligjet ndërkombëtare.