Maratona e Tiranës, ja kush fitoi dhe shpërblimet për secilin. Si u rëndit Lali Eri?

Edhe pse jo zyrtarisht, Tirana këtë të dielë u shndërrua si kryeqytet simotra për zhvillimin e maratonave. Mbi 1 mijë qytetarë, vrapues profesionistë dhe politikanë iu bashkuan kësaj maratone, jo vetëm për të garuar mes tyre por edhe për të dhënë mesazhe sensibilizuese për ushtrimin e sportit për një jetë të shëndetshme.
Maratona e Tiranës zhvillohet për herë të parë dhe u organizua për nga përmasat si çdo vend i Europës.

Në distancën 21 kilometra fitues u shpall për meshkuj Ilir Këllezi, ndërsa për femra vrapuesja e njohur Luiza Gega, e cila u konkurrua nga kryebashkiakja e Gjakovës Mimoza Kusari Lila, e cila u rendit e 3-ta.

Kryebashkiaku i Tiranës, Erion Veliaj garoi në disiplinën 10 kilometra dhe tha se ishte renditur i 500-ti ose i 600-ti.

“Kjo ishte më e vështirë se fushata. Fushata fitohet më kollaj se një maratonë. Nuk e di i sati kam dalë, i 500 apo i 600, por gjithmonë duhet të marrësh pjesë. Sot qyteti është realisht europian. Të gjithë të huajt që morën pjesë thane se një gjë të tillë nuk e kemi parë në asnjë vend të Ballkanit dhe të Rajonit. Tani besoj e kemi kaluar testin. Mezi presim që në datën 13 Tetor, javën tjetër, të marrim një datë zyrtare për t’u futur në kalendarin e maratonave të certifikuara në të gjithë Europën dhe vitin tjetër ta bëjmë akoma më të madhe, akoma më të bukur, akoma më europiane Maratonën e Tiranës”, tha Veliaj.

Fituesit e maratonës, vendi i parë, i dytë dhe i tretë morën shpërblime monetare përkatësisht, 50 mijë 30 mijë dhe 20 mijë lekë.