Marrëveshje me Kinën për ujrat, Meta: Përvoja juaj, shumë e dobishme për Shqipërinë

KINE – Në vijim të vizitës zyrtare në Republikën Popullore të Kinës, Kryetari i Kuvendit, Ilir Meta, i shoqëruar nga Ministri i Bujqësisë, Edmond Panariti dhe delegacioni parlamentar që e shoqëron, u takua me Ministrin e Burimeve Ujore të Kinës, Chen Lei, ku u zhvillua dhe ceremonia e nënshkrimit të Memorandumit të bashkëpunimit midis Ministrisë së Burimeve Ujore të Republikës Popullore të Kinës dhe Ministrisë së Bujqësisë dhe Zhvillimit Rural të Republikës së Shqipërisë në fushën e administrimit dhe menaxhimit të integruar të ujërave.

Gjatë këtij takimi, Meta nënvizoi rëndësinë e përvojës së çmuar kineze në menaxhimin e burimeve ujore në funksion të zhvillimit të bujqësisë.

“Përvoja e palës kineze në fushën e bujqësisë dhe administrimit të ujërave është shumë e dobishme për Shqipërinë, një vend me burime të shumta ujore dhe me prioritet kryesor për zhvillimin e bujqësisë”, tha Meta.

Kryetari i Kuvendit Meta vlerësoi nënshkrimin e marrëveshjes si një hap të rëndësishëm në bashkëpunimin e të dy vendeve në fushën e menaxhimit të ujërave, sidomos në drejtim të vaditjes, kullimit dhe parandalimit të përmbytjeve.

Ministri i Burimeve Ujore të Kinës, Chen Lei theksoi se Shqipëria është një vend me burime të pasura ujore dhe me potencial të lartë zhvillimi dhe mirëpriti ftesën e homologut shqiptar Panariti për të vizituar Shqipërinë duke e siguruar për mbështetjen e plotë të dikasterit që ai drejton.

Ministri Panariti i kërkoi Ministrit të Burimeve Ujore të Republikës Popullore të Kinës, Chen Lei të dërgojë në Shqipëri një grup ekspertësh për të vlerësuar situatën e menaxhimit të burimeve ujore në vend dhe për të ndërmarrë hapat konkretë në zbatimin e memorandumin i cili u nënshkrua sot nga të dyja palët.