Materiali kancerogjen në shkollë rrezikon jetën e 2 mijë nxënësve

Mosinteresimi i komunarëve të Pejës për projekte të rëndësishme që kanë të bëjnë drejtpërdrejt me shëndetin e fëmijëve, ka lenë gjallë rrezikun për nxënës nga materiali kancerogjen, azbesti që u rri mbi kokë në çatinë e shkollës fillore më të madhe në këtë komunë, që ka 1 mijë e 800 nxënës.

Prej që është ndërtuar ajo shkollë dhe ka hapur dyert për nxënës në shtatorin e vitit 1978, mbi kulmin e “Xhemajl Kadës” në Pejë, gjenden pllakat mbi çati nga azbesti, shkruan sot “Koha Ditore”.

Derisa, nga pushteti i paraluftës nuk është prit që të mendohet shumë për shëndetin e fëmijëve, një mosinteresim i njëjtë nuk është pritur edhe nga qeveritarët lokale të pasluftës në Pejë e as të nivelit qendror.

Drejtues të kësaj shkolle vazhdimisht kanë kërkuar që shkollës t’i ndërrohet çatia dhe të mbulohet me materiale të tjera të parrezikshme për shëndetin e fëmijëve. Kohët e fundit këto kërkesa janë shpeshtuar për dallim nga vitet e kaluar edhe për shkak të vjetërsisë se çatisë.