Mazhoranca humbet shumicën e cilësuar, ligjet që rrezikojnë

Largimi i deputetëve Ben Blushi dhe Mimoza Hafizi nga Partia Socialiste ka ndryshuar numrat e mazhorancës qeverisëse. Teksa deri më tani ajo ka pasur shumicë absolute, por situata duket se ka ndryshuar, sidomos sa u takon ligjeve me 84 vota. Sipas të dhënave të publikuara në faqen e internetit të Kuvendit, PS ka përfunduar me 58 deputetë. Fillimisht kjo parti ka pasur 61 deputetë, mirëpo pak kohë më parë deklaroi largimin Vladimir Kosta, ndërsa së fundmi edhe Ben Blushi me Mimoza Hafizin. Largimi i këtyre deputetëve ka bërë që numrat të zbresin në 58 dhe kjo e vendos në vështirësi PS dhe mazhorancën, pasi ka humbur shumicën e cilësuar prej 84 votash në Parlament, raporton angjencia e lajmeve Sot.

Nëse bëhet një përmbledhje e gjithë votave të koalicionit, rezulton se PS ka 58 vota, LSI ka 20 vota ndërsa PDIU ka 5 vota. Në total kjo shifër shkon në 83 vota. Por ditët e fundit është vënë re se mazhoranca e ka shumë të vështirë t’i mbledhë të gjithë deputetët dhe kjo është parë gjatë votimeve në Kuvend. Të enjten në sallë mazhoranca kishte 70 deputetë dhe kjo bëri që të shtyhej ligji për organet e drejtësisë. Por ajo që vihet re është se me këto shifra faktorizohet shumë Partia për Drejtësi, Integrim dhe Unitet. Edhe pse me praninë e Blushit dhe Hafizit sigurimi i 84 votave ishte i vështirë pa PDIU edhe mund të realizohej, duke marrë parasysh qëndrimet e një sërë deputetëve të pavarur si Mirela Ferracaku, Vagjel Dule, Tom Doshi, etj. Por tani kjo gjë është e pamundur dhe shifrat tregojnë se largimi i Blushit dhe i Hafizit ka bërë që PDIU të ketë rol vendimtar në ligjet që kërkojnë shumicë të cilësuar, pasi Ramës i mjafton të gjejë një deputet të pavarur. Nga ana tjetër largimi i Blushit dhe i Hafizit rrëzon përfundimisht planin e socialistëve për të mbajtur në këmbë qeverinë edhe pa LSI. Në gusht pati një sërë tentativash dhe nuk ja arritën dot. Shifrat e reja në Kuvend tregojnë tani se koalicioni PS-LSI-PDIU duhet të punojë si një i vetëm, pasi çdo përplasje apo mendim kundër mund të sjellë penalizmin në votim.

Ndryshe nga sa ka ndodhur deri më tani, ku mazhorancës nuk i ka interesuar shumë nëse kishte konsensusin e PD apo deputetë të pavarur, që tani e tutje duket se PS duhet të mendohet dy herë. Aktualisht mazhoranca në mënyrë zyrtare ka 83 vota në Parlament, por kjo shifër mund të jetë edhe më e ulët pasi ka disa deputetë të tjerë, vota e të cilëve nuk është e sigurt. Ata janë Eduart Ndocaj dhe Mira Shehu. Ky i pari ka kritikuar ashpër Edi Ramën dhe qeverinë, duke mos e dhënë gjithmonë votën, ndërsa Mira Sheu është një deputete pranë Koço Kokëdhimës. Kjo do të thotë se mazhoranca ka pothuajse të sigurta 81 vota në sallën e parlamentit. Kjo do të thotë se shumë ligje nuk miratohen dot, sidomos ata të reformës në drejtësi. Një ndër ligjet bazë, ai për organet e drejtësisë nuk po miratohet dot dhe ai kërkon 84 vota. Po ashtu janë dhe disa ligje të tjera, si Kodi Penal apo Kodi i Procedurës Penale, që kërkojnë po 84 vota.