Mercenarët serbë do të rrëmbenin Kryeministrin e Malit të Zi

Prokuroria Speciale Shtetërore e Malit të Zi ka njoftuar zyrtarisht se 20 serbët e arrestuar akuzohen për dy vepra kriminale, mes të cilave edhe plani për të marrë peng Kryeministritn Milo Gjukanovic.

“Ekzistojnë dyshime të bazuara se nga fillimi i tetorit në Serbi dhe Mal të Zi është formuar organizatë kriminale me qëllim të ndikimit mbi pushtetin ligjdhënës dhe ekzekutiv në Mal të Zi. Dyshohet se plani i kësaj organizate ka qenë që në kohën e shpalljes së rezultateve të zgjedhjeve parlamentare, me përdorim të armëve t’i sulmojnë qytetarët e tubuar para Kuvendit të Malit të Zi dhe nëpunësit e Drejtorisë së Policisë, e pastaj të pushtojnë hapësirat e Kuvendit, me qëllim që të shpallin fitoren zgjedhore të partive të caktuara politike”, thuhet në komunikatën e Prokurorisë që e transmetoi Radio-televizioni shtetëror.

Sipas Prokurorisë malazeze, organizatori i grupit, ish-drejtori i Xhandarmerisë serbe Branisllav Dikiç, të shtunën herët në mëngjes mbërriti në Mal të Zi me qëllim për të realizuar planin kriminal për të uzurpuar Kuvendin dhe institucionet e tjera shtetërore.

Arrestimi i serbëve dhe ish udhëheqësit të xhandarmërisë ka ndodhur në ditën kur në Mal të Zi po mbahen zgjedhjet e përgjithshme. Kryeministri Millo Gjukanovic ka thënë se Mali i Zi nuk do të dorëzohet përballë asnjë agresori e as grupeve kriminale.

Ndërkohë, Kryeministri i Serbisë, Aleksander Vucic ka thënë se është i habitur se si ka ndodhur që arrestimet të ndodhin pikërisht në ditën kur po mbahen zgjedhjet malazeze. Ka thënë se në këtë rast s’ka dorë Shteti i Serbisë.