Meta me Kotzias në Athinë: E kaluara mësim, jo burg për të ardhmen

Kryetari i Kuvendit, Ilir Meta, kërkoi dje nga Athina diskutim racional dhe konstruktiv për zgjidhjen e problemeve të trashëguara nga e kaluara.

“Unë besoj se është koha për të gjithë faktorët politikë si në Greqi, si në Shqipëri, për t’u përqendruar më shumë tek e ardhmja e përbashkët dhe për t’i diskutuar në mënyrë të qetë, racionale, konstruktive të gjitha çështjet që trashëgojmë nga e kaluara, çështje për të cilat nuk jemi ne përgjegjës. Por ne jemi përgjegjës për të ardhmen e dy vendeve tona dhe në këtë drejtim unë besoj në përgjegjshmërinë dhe vullnetin pozitiv të gjithë faktorëve për t’i parë me këtë këndvështrim edhe çështjet që trashëgojmë nga e kaluara”, tha Meta.

Këtë deklaratë kryeparlamentari Meta e bëri pas takimit me ministrin e Jashtëm të Greqisë, Nikos Kotzias, i pyetur nga gazetarët e pranishëm. Meta nisi dje një vizitë zyrtare në Greqi me ftesë të presidentit të Parlamentit të Greqisë, Nikolaos Voutsis.

Kreu i Kuvendit ishte në një linjë me ministrin e Jashtëm grek, Kotzias, që e kaluara të mos pengojë të ardhmen e dy vendeve.

“Besoj se është i qartë vullneti i dy vendeve, i qeverive, por edhe i dy parlamenteve për të dominuar në axhendën tonë, frymën pozitive të bashkëpunimit të hapur, konstruktiv, të sinqertë dhe afatgjatë. Po kështu jam shumë dakord me ministrin e Jashtëm të Greqisë, z.Kotzias, që e kaluara duhet të na shërbejë si një mësim për të ardhmen për të mos përsëritur gabimet që kemi bërë në të kaluarën dhe jo të shërbejë si një burg për të ardhmen”, tha Meta.

I pyetur për çështjen çame, Meta tha se zgjidhja duhet të jetë në favor të të dy vendeve.

“Unë besoj se ne jemi në një proces shumë pozitiv të përafrimit të qëndrimeve për shumë çështje të ndryshme të trashëguara nga e kaluara, ku do të doja të veçoja sidomos çështjen e rishikimit të historisë dhe të teksteve të historisë. Në këtë kuadër unë besoj se për çështjen ‘çame’ që ju pyetët, ekzistojnë ende dy qasje të ndryshme le të themi, por unë besoj se me durim dhe mënyrë konstruktive, ne kemi mundësi të ecim për gjithë problemet e së kaluarës drejt një zgjidhjeje ku përfitojnë të dy vendet tona dhe të dy popujt tanë”, tha Meta.

Zyra e shtypit e Kuvendit njoftoi dje se “Kryetari i Kuvendit në takimin me ministrin e Jashtëm grek preku edhe çështjen e ligjit të luftës dhe shprehu bindjen se abrogimi i tij do të krijonte hapësira për çlirimin e çështjeve të tjera të mbetura pezull.

Ilir Meta siguroi ministrin e Punëve të Jashtme, Nikos Kotzias, se Kuvendi i Shqipërisë mbështet avancimin e punës mes dy qeverive për të çuar në një stad tjetër bashkëpunimin tonë dhe se me mirëkuptim duhen zgjidhur çështjet e trashëguara”./PANORAMA